Bonifacius ¹ (episcopus seruus seruorum dei ) uenerabilibus fratribus .. ² Pacensi et Arosiensi episcopis ac dilecto filio archidiacono ecclesie Lincopensis salutem etcetera ♦ Uite ac morum honestas aliaque laudabilia probitatis et uirtutum merita super quibus apud nos dilectus filius Nicolaus Laurencii rector parrochialis ecclesie sancti Olaui in Alem Lincopensis diocesis fidedigno commendatur testimonio nos inducunt ut sibi reddamur ad graciam liberales ♦ Exhibita siquidem nobis nuper pro parte dicti Nicolai peticio continebat/ quod in statutis et consuetudinibus ecclesie Lincopensis canonice editis et inconcusse hactenus obseruatis expresse cauetur/ quod decanus ipsius Lincopensis ecclesie canonicatum et prebendam in eadem una cum dicto decanatu obtinere minime ualeat et deinde canonicatu dicte ecclesie et prebenda dicta Alean in eadem ecclesia Lincopensi ex eo quod dilectus filius Nicolaus Gutmundi ipsius Lincopensis ecclesie canonicus et huiusmodi prebendam obtinens decanatum ipsius ecclesie qui dignitas principalis in eadem existit et ad eam quis per eleccionem non assumitur ³ extra Romanam curiam tunc certo modo uacantem auctoritate ordinaria sibi collatum extitit pacifice assecutus uacantibus carissima in Christo filia Margareta regina Dacie Swecie et Norweigie ⁴ illustris eorundem canonicatus et prebende uera patrona et existens in pacifica possessione uel quasi iuris presentandi canonicum ad dictos canonicatum et prebendam prefatum Nicolaum Laurencii uenerabili fratri nostro episcopo Lincopensi infra tempus legittimum presentauit idemque episcopus eundem Nicolaum Laurencii in canonicum ipsius ecclesie auctoritate ordinaria instituit ♦ Cum autem sicut eadem peticio subiungebat prefatus Nicolaus Laurencii dubitet presentacionem et institucionem huiusmodi ex certis causis uiribus non subsistere et sicut accepimus canonicatus et prebenda predicti adhuc ut prefertur uacare noscantur nos uolentes dicto Nicolao Laurencii qui presbiter est premissorum meritorum suorum intuitu graciam facere specialem discrecioni uestre per apostolica scripta mandamus quatinus uos uel duo aut unus uestrum per uos uel alium seu alios canonicatum et prebendam predictas quorum fructus redditus et prouentus uiginti florenorum auri secundum communem extimacionem ualorem annuum ut ipse Nicolaus Laurencii asserit non excedunt siue premisso siue alio quouis modo aut ex alterius cuiuscumque persona seu alias per assecucionem alterius beneficii ecclesiastici quacumque auctoritate collati uel liberam resignacionem alicuius per eum de illis in manibus cuiuscumque ad id potestatem habentis apud sedem apostolicam uel extra dictam curiam eciam coram notario publico et testibus sponte factam et admissam uacent eciam si tanto tempore uacauerint quod eorum collacio iuxta Lateranensis statuta ^a concilii ad predictam sedem legitime deuoluta aut ipsi canonicatus et prebenda disposicioni apostolice specialiter reseruati existant dictusque Nicolaus Gutmundi uel is ex cuius persona ipsi canonicatus et prebenda ultimo uacauerint dicte sedis capellanus nuncius uel alias officialis seu fructuum et prouentuum camere apostolice debitorum collector uel succollector fuerit dummodo prefatus Nicolaus Laurencii in eisdem canonicatu et <prebenda> ⁵ intrusus non fuerit et tempore date presencium non sit in eis alicui specialiter ius quesitum cum omnibus iuribus et pertinenciis suis eidem Nicolao Laurencii auctoritate nostra conferre et assignare curetis inducentes eum uel procuratorem suum eius nomine in corporalem possessionem canonicatus et prebende iuriumque et pertinenciarum predictorum et defendentes inductum amoto exinde quolibet illicito detentore ac facientes eundem Nicolaum Laurencii uel dictum procuratorem pro eo ad huiusmodi prebendam in dicta ecclesia Lincopensi in canonicum recipi et in fratrem stallo sibi in choro et loco in capitulo ipsius ecclesie cum dicti iuris plenitudine assignatis sibique de ipsorum canonicatus et prebende fructibus redditibus prouentibus iuribus et obuencionibus uniuersis integre responderi contradictores auctoritate nostra. (appellatione postposita compescendo) ⁶ non obstantibus quibuscumque statutis et consuetudinibus ipsius ecclesie Lincopensis contrariis iuramento confirmacione apostolica uel quacumque firmitate alia roboratis aut si aliqui apostolica uel alia quauis auctoritate in eadem Lincopensi ecclesia in canonicos sint recepti uel ut recipiantur insistant seu super prouisionibus sibi faciendis de canonicatibus et prebendis ipsius ecclesie Lincopensis speciales uel aliis beneficiis ecclesiasticis in illis partibus generales. dicte sedis uel legatorum eius litteras impetrarint eciam si per eas ad inhibicionem reseruacionem et decretum uel alias quomodolibet sit processum quibus omnibus dictum Nicolaum Laurencii in assecucione dictorum canonicatus et prebende uolumus anteferri sed nullum per hoc eis quo ad assecucionem canonicatuum et prebendarum aut beneficiorum aliorum preiudicium generari aut si uenerabili fratri nostro episcopo pro tempore existenti et dilectis filiis capitulo Lincopensi uel quibusuis aliis communiter uel diuisim ab eadem sit sede indultum quod ad recepcionem uel prouisionem alicuius minime teneantur et ad id compelli aut quod interdici suspendi uel excommunicari non possint quodque de canonicatibus et prebendis ipsius ecclesie Lincopensis uel aliis beneficiis ecclesiasticis ad eorum collacionem prouisionem presentacionem seu quamuis aliam disposicionem coniunctim uel separatim spectantibus nulli ualeat prouideri per litteras apostolicas non facientes plenam et expressam ac de uerbo ad uerbum de indulto huiusmodi mencionem et qualibet alia dicte sedis indulgencia generali uel speciali cuiuscumque tenoris existat per quam presentibus non expressam uel totaliter non insertam effectus huiusmodi gracie impediri ualeat quomodolibet uel differri et de qua cuiusque toto tenore habenda sit in nostris litteris mencio specialis seu si dictus Nicolaus Laurencii presens non fuerit ad prestandum de obseruandis statutis et consuetudinibus ipsius ecclesie Lincopensis solitum iuramentum dummodo in absencia sua per procuratorem ydoneum. et cum ad ecclesiam ipsam accesserit corporaliter illud prestet aut quod prefatus Nicolaus Laurencii ut asserit dictam parrochialem ecclesiam cuius fructus redditus et prouentus eciam uiginti florenorum auri secundum extimacionem predictam ualorem annuum non excedunt noscitur obtinere ♦ Nos enim exnunc irritum decernimus et inane si secus super hiis a quoquam quauis auctoritate scienter uel ignoranter contigerit attemptari ♦ Datum Rome apud sanctum Petrum quarto kalendas marcii anno duodecimo.