Omnibus presens scriptum cernentibus Petrus Iacobi uillanus Hafnensis salutem in domino sempiternam. ♦ Nouerint uniuersi presentes et futuri quod recognosco me uiro discreto latori presencium Thome Thagesøn conuillano meo in uiginti sex marchis argenti in albis denariis legalibus et datiuis racione ueri mutui michi per ipsum amicabiliter facti teneri ueraciter obligatum. sibi uel suis heredibus per me uel meos heredes in prompta pecunia predicta et nullo alio ualore expedite et integraliter persoluendis pro qua quidem summa pecunie ipsi Thome Thagesøn dimiditatem ¹ curie mee partem uidelicet occidentalem inter curiam Iohannis Godensteen et domum lapideam eiusdem Thome Thagesøn Hafnis situate una cum fundo et ceteris pertinenciis suis nullis demptis a festo pasche proximo subsequente et sic ad uiginti septem annos immediate subsequentes inpignero per presentes condicionibus prehabitis infrascriptis ♦ Primo uidelicet quod ipse Thomas Taghesøn uel heredes sui omnes obuenciones fructus et redditus ipsius dimidie curie subleuent omni anno in sortem debiti principalis minime computandos donec dimidietas dicte curie per me uel [m]eo[s] ² heredes ab i[p]so Thoma Thagesøn uel suis heredibus dictis uiginti septem annis elapsis legaliter redimatur ♦ Terminus autem redempcionis dimidietatis dicte curie cum edificiis festo sancti Michaelis quolibet anno sit acceptus specialiter et electus in quo termino si ego uel heredes mei in redimendum dimidietatem dicte curie defecerimus quod absit extunc dictus Thomas Thagesøn uel heredes sui ipsam dimidiam curiam in pignere habeant postea sicut prius. et quidquit dictus Thomas Thagesøn uel heredes sui in ipsa dimidia curia instaurauerint siue meliorari fecerint hoc totum secundum arbitrium quatuor discretorum ad hoc specialiter eligendorum per me uel meos heredes ab ipso Thoma uel suis heredibus ante solucionem summe capitalis legaliter redimatur ♦ Puteus uero alterius partis curie usui cedat utriusque. ♦ Insuper presentibus me obligo ad appropriandum et disbrigandum predicto Thome Thagesøn et heredibus suis dictam dimidiam curiam ab inpeticionibus cuiuscumque ♦ In cuius rei testimonium sigillum meum una cum sigillis uirorum discretorum uidelicet Hermanni Krusæ proconsulis Hafnensis . Iohannis Iacobi Magni Nicholai conconsulum et Mønichini Sutoris conciuis ibidem presentibus est appensum. ♦ Datum sub anno domini m^ocd^o primo dominica Oculi.