Einveldige beuelunge etcetera ♦ Allerdurchluchte furstinne grosmechtige besundere gnedige frauwe/ ♦ Alz euwer grosmechtikeit kentczeler/ nue letz vmbe Martini in euwer hochwirdikeit botschaft von des landes wegen zcu Gotland bie vns was\ gnedige frauwe do santhe wir vnser boten vnde briffe ^a an den allerdurchluchten hern konigen Albrecht/ vnde herczogen Iohan von Mekelborgen vnde die stete Wismer vnde Rostke/ begerlich von in. bittende/ das sie vns nach luethe. erer vorschribunge ken euwer grosmechtikeit ² gnode von des landes wegen zcu Gotlande vnde der stad Wisbu\ vortrethen vnde friegen welden alzo das euwer ³ hochwirdige. durchluchtikeit ⁴ vns dorvmbe nicht durfte anlangen. ♦ Grosmechtige gnedige frauwe\ des santhen vns. der here koninge vnde herczoge vnde stete. obengeschreuen ere brifliche antwort der selben alle ^b briffe wir euwer grosmechtikeit senden in diesem briffe vorslossen/ aber das ⁵ gnedige frauwe/ haben wir aber von neugensten nue im sontage oculi/ vnser erbarn bothen gesandt muntlich von der sachen mit den steten/ Wismer/ vnde Rostke/ vnde ouch mit den gemeinen steten/ zcureden/ bittende das ⁶ sie eren hern koninge doran halden/ das her geruche noch luethe siener briffe/ zcu friegen. das landt Gotlande von euwer grosmechtikeit ansproeche der selben botschaft antwort/ alz balde sie vns kumpt/ wir euwer hochwirdikeit ouch gerne wellen schreuen wen wir io alle zciet des goet vnser gezcuege sie. wo vns das mogelich ist/ mit euwer grosmechtikeit begern gnade vnde frundschaft zcu haben vnde das land zcu Gotlandt vnde die staed Wisbue io in der moesse nicht ynne halden/ das wir is ymande meinen vorzcuhalden. dem wir is mit rechte sullen. vnde mit eren mogen abetrethen/ ⁷ wen. vns. ein billichs vnde recht dovor wieder faren. mage/ ♦ Dorumbe allerdurchluchste grosmechtige gnedige frauwe bitte wir euwer grosmechtikeit/ das ir euch hochwirdige gnedige frauwe gnediclich nicht vorhasten wellet/ ken vns vnde vnserm orden/ sunder ab is mogelich were\ euwer grosmechtige gnode sich demutigen welde/ mit dem hern koninge zcu tagen zcukomen noch begerunge des hern koninges ap goet der here mit sienen gnoden wirkende/ der sachen ein selige begerete ende gnediclich welde geben des wir gantz begereten vnde irfreuget weren ♦ Gegeben uf vnserm hueze Marieburge am dinstage noch iudika/ im xiiii^c vnde im ersten iare.