Bonifacius etcetera dilecto filio Iohanni electo Ottoniensi salutem etcetera ♦ Cum nos pridem ecclesie Ottoniensis pastoris regimine destitute de persona tua nobis et fratribus nostris ob tuorum exigentiam meritorum accepta de fratrum eorundem consilio auctoritate apostolica duximus prouidendum preficiendo te illi in episcopum et pastorem prout in nostris inde confectis litteris ^a plenius continetur nos ad ea que tue commoditatis augmentum cedere ualeant fauorabiliter intendentes tuis in hac parte supplicationibus inclinati tibi ut quocumque malueris catholico antistite graciam et communionem apostolice sedis habente astitis et in hoc sibi assistentibus duobus uel tribus catholicis episcopis similem graciam et communionem habentibus munus consecrationis recipere ualeas ac eidem antistiti ut munus predictum auctoritate nostra impendere libere tibi possit plenam et liberam concedimus tenore presentium facultatem ♦ Uolumus autem quod idem antistes qui tibi prefatum munus impendet a te nostro et ecclesie Romane nomine fidelitatis debite solitum recipiat iuramentum ^b iuxta formam quam sub bulla nostra mittimus interclusam ac formam iuramenti quod te prestare contigerit nobis de uerbo ad uerbum per tuas patentes litteras ^c tuo sigillo signatas per proprium nuncium quantocius destinare procures quodque per hoc uenerabili fratre nostro archiepiscopo Lundensi cui prefata ecclesia metropolitico iure subesse dinoscitur nullum imposterum preiudicium generetur ♦ Datum Rome apud sanctum Petrum septimo kalendas aprilis anno duodecimo.