Ersamen liben frunde als ir vns geschreben ^a had von des gutes wegen den euwirn genomen vnd wie wir euch vormols geschreben haben das irs do mete lisset besteen/ bis vnser man den wir czu der koniginne senden wolden/ widder qweme vnd denne die euwirn vmb eyn antwert czu haben bie vns hetten/ so wissed liben frunde das wir euch czu desser czith keyne entliche antwert geschreben mogen/ sunder off das erste/ als vnser manne ens den eldesten vnser steten/ bie vns sien werden/ wellen wir die sache handelen/ vnd mit in dovon reden/ vnd euch vnsers willen wie. is. blibin wird/ briefflichin vnderrichten sunderlich als ir vns geschreben had begernde/ die vnsern czu vnderwisen das sie mit euch komen ken Lubicke vor die stete\ ♦ Lieben frunde wir sind des noch nicht czu rathe worden/ das wir die vnsern vmb eren schaden der in von euwirm heren dem herczogen vnd sienen metehelfern widder vnsern orden gescheen ist vor die stete czu Lubicke vnd anders wo senden wellen/ wes wir hernochmols czu rathe werden/ das wellen wir euch wol vorschriben ² ♦ Gegeben czu Marienburg am palmobande anno xiiii^c primo.