Bonifacius etcetera carissime in Christo filie Margarete Dacie Swecie et Norwegie regine illustri salutem etcetera ♦ Prouenit ex tue deuocionis affectu quo nos et Romanam ecclesiam reuereris ut peticionibus tuis quantum cum deo possumus fauorabiliter annuamus ♦ Cum itaque sicut pro parte tua fuit propositum coram nobis frequenter contingat nonnullas personas tam religiosas quam eciam seculares ad mensam tuam tuumque hospicium declinare et aliquas ex eis tecum eciam residere quibus secundum statuta et consuetudines suorum ordinum uel uoti ¹ est esus carnium lacticiniorum uel aliorum uictualium interdictus nos tuis in hac parte supplicacionibus inclinati ut confessor tuus ydoneus quem duxeris eligendum possit eisdem personis auctoritate apostolica uescendi carnibus lacticiniis aliisque uictualibus in mensa hospicioque tuis prout tu uesceris illis diebus dumtaxat quibus a sacris canonibus esus carnium communiter prohibitus non exist<a>t ² eciam si persone ipse iuramento uel uoto ad abstinenciam esus huiusmodi sint astricte licenciam concedere et cum eis dispensare super hiis cum hoc expedire uiderit super quo ipsius confessoris conscienciam oneramus predictis statutis uel consuetudinibus ac priuilegiis apostolicis contrariis non obstantibus deuocioni tue tenore presencium indulgemus ♦ (---) ♦ Datum Rome apud sanctum Petrum quarto kalendas aprilis anno duodecimo.