Bonifacius etcetera carissime in Christo filie Margarete Dacie Swecie et Norwegie regine illustri salutem etcetera ♦ Sincere deuocionis affectus quem ad nos et Romanam geris ecclesiam merito promeretur ut te et Dacie Swecie et Norwegi<e> ¹ regna specialibus fauoribus prosequamur ♦ Attendentes igitur quod sicut exhibita nobis nuper pro parte tua peticio continebat quod regie corone dictorum regnorum ad nonnulla beneficia ecclesiastica cum cura et sine cura necnon dignitates personatus et officia ius patronatus antiquitus obtinebant quod ab ipsarum coronarum regiarum possessione ut asseritur uidetur pro parte alienatum pariter et destructum nos igitur ne ius patronatus huiusmodi tibi uel dictis regiis coronis amplius alienetur seu distrahatur sed ut pocius recuperetur prouidere uolentes ius patronatus ad singula beneficia cum cura et sine cura eciam si dignitates personatus uel officia fuerint siue per sedem apostolicam siue alias quomodolibet alienatum uel distractum quod prefate corone regie ² antiquitus obtinebant ad ius et proprietatem earundem coronarum regiarum reducimus restituimus ac auctoritate apostolica tenore presencium recuperamus uolentes predictas coronas regias in huiusmodi iure habere perpetuo conseruatas litterasque apostolicas ac alias et priuilegia quecunque in eneruacionem premissorum concessas uel concessa quarum tenorem de uerbo ad uerbum presentibus haberi uolumus pro sufficienter expressis eadem auctoritate apostolica tenore presencium reuocamus cassamus irritamus et nullius esse uolumus roboris uel momenti ♦ Nulli ergo (---) nostre reductionis restitucionis recuperacionis concessionis reuocacionis cassacionis et uoluntatis infringere (---) ♦ Datum Rome apud sanctum Petrum quarto kalendas aprilis anno duodecimo.