Omnibus presens scriptum cernentibus Iohannes Gørstinge, rector generalis placiti terre Sielandie, salutem in domino sempiternam. ♦ Nouerint uniuersi tam presentes quam futuri, quod recognosco me ex deliberato consilio unam curiam in Kygringæ sitam a nobilibus dominabus, uidelicet sorore Sophia Clauesse doter, abbatissa claustri beate Clare Roskildis, ceterisque sororibus ibidem cum omnibus suis pertinenciis, humidis et siccis, ad dies meos pro uno talento annone unoque solido grossorum, festo purificacionis beate uirginis annuatim loco pensionis integraliter persoluendis, conductiue habuisse per presentes, tali tamen habita condicione, quod si predicta pensio annuatim, ut premissum est, tempore solucionis prefixo, non fuerit persoluta, curiam predictam cum pertinenciis uniuersis possessioni earum relinquam alicuius contradictione non obstante. ♦ Item predictam curiam meliorabo et instaurabo, et, me de illa separato earum curia meliorata et edificata illarum conuentui libere cedat sine impeticione cuiuscumque, sicud in mea aperta litera, quam ipsis dederam, continetur. ♦ In cuius rei testimonium sigillum meum presentibus est appensum. ♦ Datum Roskildis anno domini m^ocd^o primo feria vi^ta pasche.