Omnibus presens scriptum cernentibus Andreas Petri armiger de Swanæholm eternam in domino salutem. ♦ Nouerint uniuersi. quod recognosco per presentes. uirum nobilem Awonem Steegh armigerum de Ølsiæmaglæ duas curias uillicales in Vblestorp Wolburshæret in parrochia Lyungby sitas quarum unam inhabitat quidam Olauus Nicolai cui adiacent sedecim solidi terrarum in censu. alteram uero inhabitat Boecius Iohannis cui adiacent duodecim solidi terrarum in censu cum omnibus dictarum curiarum adiacenciis nullis demptis a me legittime racione uere hereditatis sibi contingentis in eisdem secundum leges terre euixisse. quare eidem Aw[oni] dicta bona deliberato animo ab impeticione mea meorumque heredum libere dimitto per presentes. ♦ Insuper si alique littere apperte super dictis bonis Vblestorp inuente fuerint contra dictum Awonem uel heredes suos per me uel heredes meos ipsas casso penitus et adnichilo per presentes recognoscens me nullum ius habere quacumque occasione in eisdem. ♦ Insuper eidem Awoni quandam litteram appertam in qua dominus Iohannes Martini quondam miles bone memorie cognatus ipsius Awonis obligatus erat domino Andree Petri quondam militi de Alnæthorp auo meo pro centum marchis puri argenti ponderis Coloniensis pleno iure assigno. publice recognoscens ipsum Awonem michi pro dicta littera satisfecisse. ♦ In cuius rei testimonium sigillum meum una cum sigillis uirorum nobilium uidelicet domini Nicolai Byllæ canonici Roskildensis Hemmingi Iohannis de Kindby et Andree Griis armigerorum presentibus est appensum. ♦ Datum anno domini m^o cd^o primo. sabbato proximo quatuor temporum ante festum sancte trinitatis.