Bonifatius etcetera ad perpetuam rei memoriam ¹ uenerabilibus fratribus archiepiscopis et dilectis filiis electis abbatibus prioribus decanis archidiaconis ac rectoribus ecclesiarum et beneficiatis curatis uel non curatis quibuscumque ceterisque Christi fidelibus utriusque sexus ad quos presentes littere peruenerint salutem etcetera ♦ Quot et quantis aduersitatibus ² quantisque pressuris et angustiis quantaque rerum instabilitate presentis uite condicio uarietur ex ipsis rerum euentibus cuilibet euidenter apparet ♦ Clarescit enim iam undique Iherusalem ciuitatem sanctam matrem nostre redempcionis flagellari et crebris insultationibus Agarenorum uexari et iacere sub iugo miserabilis seruitutis diuersasque rerum mutationes tociens fieri ut prosperitas que dudum satis patuit in eadem durabilis nunc prochdolor et oppressa et instabilis uideatur ♦ Sane exhibita nobis nuper pro parte dilectorum filiorum preceptorum ac fratrum et confratrum domus et hospitalis pauperum beate Marie ac sancti Iohannis Iherusolimitani in Datia Norwegia et Swecia consistentium petitio continebat quod dudum felicis recordationis Innocentius papa IIII predecessor noster uolens oppressionibus ³ huiusmodi et exinde necessitatibus et expensis que pro releuatione et sustentatione armigerorum contra infideles continue pugnantium ac pauperum infirmorum et aliorum forensium diuersis modis occurrentium et quotidie frequentantium aliisque diuersis oneribus incumbentibus domui et hospitali predictis ac fratribus ipsius domus et hospitalis ubique terrarum Christo laudabiliter famulantibus presertim illis qui per Datiam Norwegiam et Swetiam constituti existunt diuersis priuilegiis exempcionibus litteris recommendatoriis et fauoribus omnes fratres et confratres domus et hospitalis predictorum in ipsis partibus commorantes multipliciter communi<u>it ⁴ eosque piis tuitionibus et fauoribus studuit specialiter commendare diuersas indulgentias et remissiones hiis qui pro releuatione necessitatum et aliorum onerum premissorum manus porrigerent adiutrices largiendo prout in ⁵ litteris dicti predecessoris inde confectis quas presentibus haberi uolumus pro expressis plenius dicitur contineri ♦ Cum autem sicut eadem petitio subiungebat elemosine qu<e> ⁶ a Christi fidelibus pro manutenendis et conseruandis salubriter dictis operibus pietatis solebant offerri sunt adeo diminute quod ab inceptis et solitis caute bonitatis largitionibus elemosinis subuentionibus administrationibus in armigeros pauperes infirmos et alios predictos dicti fratres per impotentiam desistere compelluntur/ quare pro parte ipsorum preceptorum fratrum et confratrum domus et hospitalis predictorum in Datia Norwegia et Swetia consistentium nobis fuit humiliter supplicatum ut super hiis prouidere de benignitate apostolica dignaremur nos igitur attendentes quod sicut habet fidedignorum assertio in prefatis domo et hospitali ex ipsis bonis pie collatis cotidie tot armati debellantes contra infideles tot infirmi et pauperes recipiuntur et sustentantur ipsisque infirmis necessaria pro sustentatione uite et liberatione infirmorum benigne tribuuntur et administrantur inducimur non immerito prefati predecessoris inherere uestigiis statui et conseruationi ipsius domus et hospitalis preceptorum ac fratrum et confratrum eorundem ex causa multimoda et salubri ut proinde ⁷ de incumbentibus oneribus et neccessitatibus predictis facilius releuentur de oportuno remedio prouidendo/ ♦ Quocirca fidelium mentes circa premissa pietatis opera excitare uolentes uniuersitatem uestram rogamus per aspersionem sanguinis Ihesu Christi ut huius domus et hospitalis fratres confratres et nuntios qui in dictis partibus Datie Norwegie et Swetie existunt cum eorum adiutoribus utriusque sexus tamquam Christi fideles suscipiatis fauoribus et subsidiis ac litteris recommendaticiis recommissos uestrisque elemosinis pauperes et infirmos hospitalis predicti per manus ipsorum fratrum et ⁸ confratrum in illis partibus commorantium studeatis misericorditer subleuare ♦ Preterea cum sicut accepimus a Romanis pontificibus predecessoribus nostris eisdem fratribus et confratribus indultum existat quod ubicumque terrarum presertim per Daciam Norwegiam et Swetiam quandocumque a sede apostolica uel eius auctoritate quauis occasione diuinum officium interdictum uel suspensum existit liceat ipsis fratribus et confratribus utriusque sexus tempore interdicti huiusmodi uel suspensionis excommunicatis et interdictis exclusis diuinis offitiis interesse et insuper quo<a>d ⁹ homicidas publicos eliminatos et feminas que ex incuria proprios oppresserunt infantes uel aqua submergi igne exuri aut ferris dilaniari permiserunt clericorum percussores citra tamen sanguinis effusionem et qui parentes offenderunt absque uiolenta manuum iniectione similiter eos qui ecclesias uel claustra aut alia pia loca incastrarunt uel ad ipsa fugientes bello temerario occuparunt et in ecclesiis uel cimiteriis sanguinem effuderunt adulteros incestuosos spoliatores uenenatores periuros et in ceteris casibus episcopalibus absolutionis beneficium impendere pro commissis iniuncta eis exinde pro modo culpe penitentia salutari et sancte matri ecclesie reconciliare nos omnia premissa sic concessa ex certa scientia auctoritate apostolica harum serie confirmamus et presentis scripti patrocinio communimus ac dictis fratribus prefati hospitalis in predictis regnis precipue constitutis et eorum ¹⁰ cuilibet ea omnia et singula de nouo licere concedimus per presentes ♦ Ceterum de uberioris dono gratie omnibus et singulis tam clericis quam laicis utriusque sexus qui* ¹¹ predictos fratres et confratres uel nuntios eorum per partes predictas Datie Norwegie et Swetie ut prefertur ¹² constitutas pro sustentatione armigerorum infirmorum pauperum et aliorum premissorum elemosinis consiliis auxiliis fauoribus prosequentur centum dies de iniunctis eis penitentiis misericorditer relaxamus presentibus perpetuis futuris temporibus duraturis ♦ Nulli ergo (omnino hominum liceat hanc paginam) ¹³ nostre confirmationis communitionis concessionis et relaxationis infringere (uel ei ausu temerario contraire) ♦ Si quis (autem hoc attemptare presumpserit indignationem omnipotentis dei et beatorum Petri et Pauli apostolorum eius se nouerit incursurum) ¹⁴ ♦ Datum Rome apud sanctum Petrum secundo nonas maii anno tertiodecimo/