Bonifatius ¹ (episcopus seruus seruorum dei) uenerabilibus fratribus Burglanensi et Ottoniensi episcopis ac dilecto filio abbati monasterii Omnium sanctorum prope ciuitatem Lundensem ² salutem ³ (et apostolicam benedictionem) ♦ Uite ac morum honestas aliaque laudabilia probitatis et uirtutum merita super quibus apud nos dilectus filius Nicolaus Tuwonis rector parrochialis ecclesie sancti Iohannis baptiste in Fletogw Lundensis diocesis fidedigno commendatur testimonio nos inducunt ut sibi reddamur ad graciam liberales ♦ Exhibita siquidem nobis nuper pro parte dicti ⁴ Nicolai peticio continebat quod olim canonicatu etminori ⁵ prebenda ecclesie Lundensis in qua maiores et minores prebende fore noscuntur per liberam resignacionem quondam Erici de Kullen tunc eiusdem ecclesie canonici per eum de illis quos tunc temporis obtinebat in manibus loci ordinarii extra Romanam curiam sponte factam et per eundem ordinarium auctoritate ordinaria extra eandem curiam admissam uacantibus idem ordinarius eosdem canonicatum et minorem prebendam sic uacantes prefato Nicolao eadem auctoritate contulit et de illis eciam prouidit ipseque uigore predictarum collacionis et prouisionis eosdem canonicatum et prebendam assecutus illos ⁶ extunc tenuit et possedit prout tenet et possidet pacifice et quiete ♦ Cum autem sicut eadem peticio subiungebat idem Nicolaus dubitet easdem collacionem et prouisionem uiribus non subsistere et sicut accepimus predicti canonicatus et prebenda adhuc ut prefertur uacare noscantur nos uolentes eidem Nicolao premissorum meritorum suorum intuitu graciam facere specialem discrecioni uestre per apostolica scripta mandamus quatinus uos uel duo aut unus uestrum per uos uel alium seu alios canonicatum et minorem prebendam predictos quorum fructus redditus et prouentus octo florenorum auri secundum communem extimacionem ualorem annuum ut ipse Nicolaus asserit non excedunt siue premisso siue alio quouis modo aut ex alterius cuiuscumque persona uel per assecucionem alterius beneficii ecclesiastici apostolica uel huiusmodi ordinaria auctoritate collati uel similem resignacionem in manibus alicuius ad id potestatem habentis eciam coram notario publico et testibus sponte factam. uacent etiam si tanto tempore uacauerint/ quod eorum collacio iuxta Lateranensis statuta ^a concilii ad sedem apostolicam legitime deuoluta aut canonicatus et minor prebenda predicti ex eo generaliter quod aliquis eos tunc obtinens illos in aliquem euentum ex uoluntate sedis eiusdem se obtulit dimissurum uel alias disposicioni apostolice specialiter reseruati existant et etiam si persona huiusmodi sedis predicte cappellanus nuntius uel alias officialis seu litterarum apostolicarum scriptor uel abbreuiator aut ipsius sedis uel alicuius ex uenerabilibus fratribus nostris sancte Romane ecclesie cardinalibus familiaris fuerit et eciam si super eis inter aliquos lis cuius statum haberi uolumus presentibus pro expresso pendeat indecisa dummodo ipse Nicolaus in dictis canonicatu et minori prebenda intrusus non fuerit et tempore date presentium non sit in eis alicui specialiter ius quesitum cum plenitudine iuris canonici ac omnibus iuribus et pertinentiis suis eidem Nicolao auctoritate nostra conferre et assignare curetis inducentes eum uel procuratorem suum eius nomine in corporalem possessionem canonicatus et minoris prebende iuriumque et pertinentiarum predictorum eadem auctoritate et defendentes inductum amoto exinde quolibet illicito detentore ac facientes ipsum Nicolaum uel dictum procuratorem pro eo ad eandem minorem prebendam in ipsa ecclesia ⁷ Lundensi in canonicum recipi et in fratrem stallo sibi in choro et loco in capitulo ipsius ecclesie cum dicti iuris plenitudine assignatis sibique de ipsorum canonicatus et minoris prebende fructibus redditibus prouentibus iuribus et obuentionibus uniuersis integre responderi contradictores auctoritate nostra (appellacione postposita compescendo) ⁸ non obstantibus tam felicis recordacionis Bonifacii pape VIII predecessoris nostri quam aliis constitucionibus apostolicis necnon statutis et consuetudinibus ipsius ecclesie Lundensis quibuscumque contrariis iuramento confirmacione apostolica uel quacumque firmitate alia roboratis aut si aliqui apostolica uel alia quauis auctoritate in eadem ecclesia in canonicos sint recepti uel ut recipiantur insistant seu si super prouisionibus sibi faciendis de canonicatibus et minoribus prebendis in ipsa ecclesia Lundensi speciales aut aliis beneficiis ecclesiasticis in illis partibus generales predicte sedis uel legatorum eius litteras impetrarint eciam si per eas ad inhibicionem reseruacionem et decretum uel alias quomolibet sit processum quibus omnibus eundem Nicolaum in assecucione dictorum canonicatus et minoris prebende uolumus anteferri sed nullum per hoc eis quo ad assecucionem canonicatuum et minorum prebendarum aut beneficiorum aliorum preiudicium generari seu si archiepiscopo .. pro tempore exstenti et dilectis filiis capitulo Lundensi uel quibusuis aliis communiter uel diuisim a predicta sit sede indultum quod ad receptionem uel prouisionem alicuius minime teneantur. et ad id compelli aut quod interdici suspendi uel excommunicari non possint quodque de canonicatibus et minoribus prebendis ipsius ecclesie uel aliis beneficiis ecclesiasticis ad eorum collationem prouisionem presentacionem seu quamuis aliam dispositionem coniunctim uel separatim spectantibus nulli ualeat prouideri per litteras apostolicas non facientes plenam et expressam ac de uerbo ad uerbum de indulto huiusmodi mencionem et qualibet alia dicte sedis indulgencia generali uel speciali cuiuscunque tenoris existat per quam presentibus non expressam uel totaliter non insertam effectus huiusmodi ⁹ * gracie impediri ualeat quomodolibet uel differri et de qua cuiusque toto tenore habenda sit in nostris litteris mencio specialis aut si dictus Nicolaus presens non fuerit ad prestandum de obseruandis statutis et consuetudinibus ipsius ecclesie Lundensis solitum iuramentum dummodo <in absencia> ¹⁰ sua per procuratorem ydoneum et cum ad ecclesiam ipsam accesserit corporaliter illud prestet seu quod idem Nicolaus ut asserit eandem parrochialem ecclesiam cuius fructus redditus et prouentus septem ducatorum auri secundum extimacionem predictam ualorem annuum non excedunt noscitur obtinere ♦ Nos enim exnunc irritum decernimus et ina<ne> ¹¹ si secus super hiis a quoquam quauis auctoritate scienter uel ignoranter contigerit attemptari ♦ Datum Rome apud sanctum Petrum secundo nonas marcii anno quartodecimo\