Henri par la grace de dieu roy Dengleterre et de France et seignur Dirlande.. As tresorer et chamberleins de nostre eschequier saluz.. Nous vous mandons que a les persones desouz nommez facez paier les sommes desouz expressees pur diuerses chiualx de eux achatez per Wauter Morton de nostre commandement pur les chares de nostre treschiere et tresamee fille Philippe cestassauoir a Thomas Totty pur vn chival grysel. sys liures tresze souldz et quatre deniers a Reynalde Surteys pur un chiual bausyn noef liures sys souldz et oyt deniers a Robert Thorley pur vn chiual noir dys liures. a Johan Merbury pur vn chiual grysel dys liures/ a Johan Hauke pur vn chiual noir sys liures a Johan Roundelle pur vn chiual sorelle: dys liures/ a mesme celui Johan Roundelle pur vn grenew amblere sys liures tresze souldz et quatre deniers a William Norton pur vn chiual grysel. tresze liures sys souldz et oyt deniers. a mesme celui William pur vn chiual pomely gray. tresze liures sys souldz et oyt deniers/ a Johan Mason pur vn chiual irnegray. dousze liures tresze souldz et quatre deniers/.. Donnez souz nostre priue seal a Westminster le vi. jour de marz lan de nostre regne quart..