Iohannes dei et apostolice sedis gracia. episcopus Slewicensis uniuersis et singulis ecclesiarum et cappellarum rectoribus seu uicerectoribus uicariis officiantibus altaristis ceterisque presbiteris et clericis quibuscumque per ciuitatem et dyocesim nostram S[lesui]censem ubilibet constitutis salutem in domino. ♦ Graui querela reuerendi patris domini Eghardi prepositi monasterii in Bardesholme ordinis sancti Augustini Bremensis dyocesis . necnon religiosorum uirorum. prioris et conuentus dicti monasterii. ad nostrum deuenit auditum quomodo quidam iniquitatis filius. dictus Tymmo Dryf{uo}d . dyabolo instigante. quendam religiosum uirum Nicolaum Stenbeken professorem dicti monasterii preparantem se suis preuiis orationibus et deuocionibus pro missa defunctorum celebranda in dicto monasterio hora per sacram ordinacionem dicti monasterii ad hoc deputata. deambulanteque dicto domino Nicolao in circuitu cimiterii dicti monasterii pro huiusmodi deuocione recolligenda ipse pestifer Tymmo prenominatus extracto ense sine quacunque culpa reali uel uerbali. dicti. domini Nicolai eundem ¹ crudeliter transfixit et inhumaniter interfecit cum cranei multiplicata sectione cerebri fusione et transfixione viscerum multiformi sicque per cruentem dyaboli ministrum in celebraturo Christi hostiam. Christo hostia et uictima ² extitit consecrata ♦ Reuera pro celebraturo pro sepultis. pro sepeliendo exstitit celebratum. ♦ [Huius] facinoris qualitatem inhumanitatem et truculentiam ecclesia militans luctu lugubri detestatur sed congaudet ecclesia triumphans de martire et athleta. ♦ Et quod lamentabilius refer[imus dictu]s Tymmo post tantum scelus [com]missum morte quam dupliciter meruerat preuentus in sacrata terra quam tam uiliter et execratissime polluerat et prophanarat ex[titit] tumulatus. qui nec. cum furibus et latronibus famulo illius qu[i uia] ³ uita et ueritas erat uitam furatus meruit sepeliri ♦ Frustra enim. ⁴ legis auxilium in[uocat] qui com[mittit in legem ♦ Unde nos Iohannes episcopus antedictus condolendo dictæ dolenti] militanti ecclesie uobis omnibus [et s]ingulis supradictis et cuilibet uestrum qui tenore presentium f[ue]ritis requisiti seu fuerit requisitus in uirtute sancte obediencie et sub exc[ommunicationis pena quam in uos et quemlibet uestrum ferimus in dei nomine in hiis scriptis si non feceritis quod mandatur canonica monitione premissa districte precipiendo mandamus quatenus mon[eatis et requir]atis rectorem in [E]kerenvorde nec[non propinquior]es amicos heredes et consangui[neos dicti] malefactoris ut eundem de cimiterio in Ekerenv{oe}rde infra quindecim d[ierum] spacium. quos eisdem. et cuilibet eorum pro trina et canonica monicione assignamus et uos assignetis. dictum Tymmonem extumulent et exhument. deoque et ecclesie et dicto domino [preposito] eiusque monasterio et nobis de tanta exorbitacione et dampnis et iniuriis inde secutis cum effectu satisfaciant cimiteriumque in Ekerenvorde reconsiliari procurent aut medio tempore coram nobis aut nostro officiali. Swafstede compareant. ad dicendum causam racionabilem si quam habeant quare ad premissa minime teneantur. ♦ Alioquin lapso dicto termino si non paruerint nec comparuerint ut prefertur. extunc prefatos. rectorem in Ekerevorde necnon propinquiores amicos consanguineos et heredes antefati Tymmonis Dryfud in ecclesiis et capellis uestris singulis diebus dominicis et festiuis infra missarum sollempnia coram plebe publice de uestris ambonibus excommunicatos publice nuncietis. quos et nos exnunc prout extunc et extunc prout exnunc sub dei nomine inuocato ⁵ excommunicamus in hiis scriptis. ♦ Uolumus insuper quod in dicta ecclesia Ekerenvorde tam diu teneatur strictissimum interdictum donec aliud a nobis super hoc receperitis in mandatis. ♦ In signum uestre exsecucionis reddite presens nostrum mandatum debite sigillatum cum cedulis transfixis diem horam modum et formam in se continens. ♦ Datum Swafstede anno domini. m^o.cccc^oiii^o. feria secunda post dominicam qua cantatur Iudica nostro pendente sub sigillo.