Ersamen lieben getruwen ♦ Als ir vns habt geschreben von den s{oe}ldenern czu halden vnd begeret/ ab is mit vnserem willen mochte sien/ das die vnkost von der s{oe}ldener wegen gemynnert wurde/ bis czu der cziet/ das ir von vns vernemen m{oe}cht/ wie sich der tag enden vnd slissen wil/ den wir mit der konigynne von Denemarken vff genomen haben etcetera ♦ Ir wisset wol lieben getruwen/ das der tag mit der konigin vfgenomen ist/ nicht lenger bis czu sand ¹ Iohannis baptisten tag/ wie is denne vordan werden wil/ das steet czu gote/ ♦ Wir versehen vns wol/ das wir der konigynne von deme lande Gotlande entwerten werden/ czu thun do mit/ als vns das fuglich vnd erlich mag sien/ derkennet ir hir bie/ das ir der soldener emperen moget/ adir so viel ² nicht halden dorffet als czu vor/ czu euwer stat vnd des landes/ fromen vnd notdorft euwer vnd vnser ere do mit czu vorwaren so ist is vnser wille wol/ das ir sie lasset czien vnd die vnkost von irer wegen mynret vnd gerynget/ adir wordt ir sie lossen czien von euch/ vnd noch dem tage adir do vor hulfe bedurfen wordt/ vns dar vmbe schribende/ vnd wir vil lichte/ euch nicht so schire als ir begernde weret l{ue}the czu hulfe mochten senden/ so wellen wir an semelichen vorsumenisse keyne schult haben sunder do got vor sie/ ³ ab an dem lande adir an der stat ichtes geschege das were vns leidt ♦ Gegeben tzu Marienburg ⁴ am suntage palmarum im xiiii^c vnd dritten iare.