Bonifacius etcetera uenerabili fratri Petro episcopo Roschildensi salutem etcetera. ♦ Pie postulacio uoluntatis effectu debet prosequente compleri et ut sacre religionis uigor succrescat uberius et deuocionis sinceritas laudabiliter enitescat ♦ Sane dudum pro parte carissime in Christo filie nostre Margarete regine Dacie illustris nobis exposito quod quondam Yda relicta quondam Thorkilli Nicolai laici uidua de propria salute recogitans et cupiens terrena in celestia et transitoria in eterna felici comercio commutare omnia bona sua et specialiter curiam suam Gladsaxe in diocesi Lundunensi consistentem ad hoc pia et prouida intencione reliquerat quod in dicta curia monasterium certi approbati ordinis fundaretur et de bonis eisdem dotaretur quodque certa curia ipsius regine curia Annes uulgariter appellata in tua diocesi Roschildensi consistens multo utilior et eciam commodosior quod in ipsa huiusmodi monasterium fundaretur extiterat ipsaque regina eciam zelo deuocionis accensa ad hoc quod huiusmodi monasterium fundaretur pariter et dotaretur in eadem curia Annes uocata utpote in loco ¹ magis congruo et honesto predictam curiam suam pro eadem curia Gladsaxe desiderabat permutare necnon pro parte dicte regine nobis tunc humiliter supplicato ut eandem permutacionem fieri per discretum aliquem mandaremus ♦ Nos tibi tuo nomine proprio non expresso per alias nostras litteras dedimus in mandatis ut de predictis curiis et earum ualore atque aliis circumstanciis uniuersis que circa hec forent attendenda autoritate nostra te diligenter informares et si per informacionem huiusmodi reperires quod prefata curia ipsius regine melior et utilior esset ad hoc quod dictum monasterium inibi fundaretur quam erat curia predicta per eandem uiduam ut premittitur relicta predictam curiam per eandem uiduam relictam pro ipsa curia eiusdem regine autoritate nostra studeres permutare prout in ipsis litteris plenius continetur ♦ Postmodum uero sicut exhibita nobis nuper pro tua et dicte regine parte peticio continebat tu ad execucionem dictarum litterarum procedens quia per informacionem per te super hoc habitam dictam curiam regine prefate meliorem et utiliorem esse ad hoc quod dictum monasterium inibi quam quod in relicta curia memorata fundaretur unde tu qui executor et dicta regina que executrix ut asseritis ultime uoluntatis Yde predicte per eam deputati fuistis inuicem permutacionem huiusmodi fecistis quodque successiue tu et dicta regina prouide considerantes quod dictum monasterium posset in loco uocato Gabeno dicte tue diocesis tamquam ad hoc magis comodose et abiliori ² fundari unde tu et regina prefati nouum monasterium in eodem loco Gabeno construi et fundari incepistis opere non modicum sumptuoso quod eciam perficere dictumque monasterium nouum competentibus redditibus dotare proponitis pro una abbatissa pro tempore et conuentu monialium ordinis sancti Augustini quequidem abbatissa et moniales uiuere debeant pro tempore iuxta dilectarum in Christo filiarum priorisse ³ et monialium monasterii sancte Agnetis Roschildensis per priorissam soliti gubernari ⁴ ordinis predicti sub cura et secundum instituta fratrum predicatorum uiuencium mores et uitam necnon eciam regularia instituta earundem ♦ Cum autem sicut eadem peticio subiungebat ad hoc quod huiusmodi cultus in eodem nouo monasterio pro tempore habeatur et obseruancia eiusdem ordinis uigeat necnon dictum nouum monasterium in spiritualibus et temporalibus proficere possit non mediocriter expediat immo necessarium sit omnino quod octo uel nouem ex monialibus dicti monasterii sancte Agnetis que triginta uel circa sunt in numero ad ipsum nouum monasterium transferantur que perpetue resideant et domino famulentur in ipso et que ex se ipsis unam eligant ad hoc ydoneam in earum et dicti noui monasterii abbatissam cuius electio per te uel successores ⁵ huiusmodi pro tempore confirmetur quodque abbatissa et moniales huiusmodi ac persone que in eodem nouo monasterio residebunt pro tempore tue et successorum tuorum episcoporum Roschildensium qui erunt pro tempore iurisdictioni et potestati ordinarie in omnibus sint subiecte ac per te necnon successores tuos eisdem abbatisse et monialibus ipsis eiusdem noui monasterii ydoneus sacerdos eciam per te ac eosdem successores pro tempore deputetur qui missas et alia diuina officia ^{6 *} in capella seu ecclesia dicti noui monasterii in presencia earundem abbatisse ac monialium dicti noui monasterii celebrare ipsarum quoque confessiones audire necnon eis penitencias salutares imponere atque ipsis ecclesiastica sacramenta ministrare pro tempore sit astrictus pro parte tua et dicte regine nobis fuit humiliter supplicatum ut super hoc et alias statui et utilitati dicti noui monasterii oportune prouidere de speciali gracia dignaremur ♦ Nos igitur ut huiusmodi deuocio quam tu et dicta regina non absque magne laudis preconio ad nos et eandem ecclesiam gerere comprobamini et eciam diuinus cultus et regularis obseruancia huiusmodi in partibus illis feruencius augeatur huiusmodi supplicacionibus inclinati recipiendi per te de ipso monasterio sancte Agnetis huiusmodi hac uice duntaxat octo uel nouem moniales de quibus tibi uidebitur ad hoc ydoneas et utiles necnon illas ad predictum nouum monasterium transferendi eciam forsan renitentes seu inuitas ac inibi collocandi uel ponendi que sub huiusmodi obseruancia regulari predicti ordinis iuxta eadem instituta necnon mores et uitam earundem abbatisse et monialium dicti monasterii sancte Agnetis ibidem uiuere necnon in eodem nouo monasterio sancti Augustini quandiu uitam duxerint in humanis altissimo famulari et que unam ex se ipsis ad hoc utilem et ydoneam in abbatissam eiusdem noui monasterii eligere teneantur et huiusmodi eleccionem dummodo alias canonice facta fuerit per te aut successores huiusmodi pro tempore confirmandi ipsamque abbatissam pro tempore benedicendi ac faciendi sibi per subditos suos reuerenciam et obedienciam debitas exhiberi necnon eciam dictum presbiterum qui missas et alia diuina officia huiusmodi in eadem capella seu ecclesia huiusmodi in presencia dictarum abbatisse et monialium eiusdem noui monasterii celebret ipsarumque confessiones audiat et imponat eisdem pro commissis penitenciam salutarem necnon ministret sacramenta huiusmodi pro tempore deputandi ac eciam dictum nouum monasterium quociens expedierit in capite et in membris uisitandi et excessus <commiss>os ⁷ per abbatissam et moniales necnon alias personas huiusmodi quas in eodem nouo monasterio residere pro tempore contingerit iuxta dicti ordinis regularia instituta huiusmodi puniendi et corrigendi necnon contradictores quoslibet et rebelles per censuram ecclesiasticam appellacione postposita compescendo tibi et successoribus ipsis pro tempore plenam et liberam autoritate apostolica tenore presencium concedimus facultatem. ♦ Uolumus autem et eadem autoritate decernimus quod abbatissa et moniales ac persone huiusmodi que in dicto nouo ⁸ monasterio residebunt pro tempore omnibus priuilegiis indulgenciis graciis exempcionibus ac libertatibus alias uti et gaudere debeant quibus predicte priorissa ⁹ et moniales eiusdem monasterii sancte Agnetis pro tempore ex concessionibus apostolicis gaudent seu eciam quomodolibet pociuntur non obstante si aliquibus communiter uel diuisim a sede apostolica sit indultum quod interdici suspendi uel excommunicari non possint per litteras apostolicas non facientes plenam et expressam ac de uerbo ad uerbum de indulto huiusmodi mencionem ♦ Datum Rome apud sanctum Petrum undecimo kalendas maii anno quartodecimo.