Bonifacius (episcopus seruus seruorum dei). dilectis filiis Salomoni in Esrom et Nicolao in Sora Cisterciensis ordinis Roschildensis diocesis monasteriorum abbatibus in regnis Dacie Swecie et Norwegie uicariis generalibus ordinis predicti per sedem apostolicam deputatis salutem (et apostolicam benedictionem). ♦ Religionis zelus uite mundicia aliaque eximia dona uirtutum quibus personas uestras fore intelleximus insignitas spem nobis indubiam pollicentur/ ut ea que uobis duxerimus committenda exequamini fideliter et prudenter/ ♦ Cum itaque occupantes monasterium Cistertii Cabilonensis diocesis quod caput Cisterciensis ordinis existit cum quatuor suis lineis principalibus sub temporali dicione scismaticorum consistit et degentes in eodem monasterio nescientes in semitis domini et rectis dirigere gressus suos eisdem scismaticis adhereant ipsisque prestent auxilium consilium et fauorem sic a sancta Romana ecclesia matre uniuersorum Christi fidelium et magistra dampnabiliter deuiando propter quod alia monasteria necnon membra et loca eidem monasterio Cistercii subiecta siue ab ipso dependencia que ubilibet consistunt in ritu et obseruancia regulari necnon in spiritualibus et temporalibus propterea grauia subierint hactenus et in futurum uerisimiliter subire timeantur detrimenta/ et sicut exhibita nobis nuper pro parte carissime in Christo filie nostre Margarete regine Dacie Swecie et Norwegie illustris peticio continebat licet dilectum filium Castielum abbatem monasterii de Brandulo dicti ordinis Clugiensis diocesis uicarium generalem predicti ordinis usque ad nostrum beneplacitum auctoritate apostolica alias duxerimus deputandum tamen uos et ceteri abbates monasteriorum predicti ordinis in Dacie Swecie et Norwegie regnis consistencium propter marina et alia uiarum nota discrimina et pericula eundem uicarium adire pro tempore nequeatis in casibus seu negociis emergentibus/ que huiusmodi monasteria in eisdem regnis consistencia et personas utriusque sexus sub dicti ordinis obseruantia regulari domino pro tempore famulantes in ipsis concernunt seu contingunt/ et cum ipsa regna et eorum prouincie maris fluctibus undique sint uallata ita quod ad ipsa forencium presertim regularium personarum dicti ordinis rarus hactenus habitus fuit et habeatur accessus et propterea contingit quod quando capitula generalia uel specialia iuxta morem ordinis memorati debeant celebrari uobis et aliis abbatibus ac personis huiusmodi in eisdem monasteriis consistentibus ut prefertur constare non possit in non modicum detrimentum monasteriorum consistencium in regnis eisdem et dispendium animarum personarum huiusmodi ut premittitur degencium pro tempore in monasteriis antedictis quare dicta regina nobis humiliter supplicauit ut pro bono statu monasteriorum dicti ordinis consistencium in eisdem regnis et reformacione morum personarum utriusque sexus huiusmodi degentium in eisdem ut prefertur et pro restaurandis obseruancia et disciplina regularibus in huiusmodi consistentibus in regnis antedictis et eciam in Colbatz et Hilda predicti ordinis Caminensis diocesis monasteriis quequidem in Colbatz et in Hilda monasteria licet extra dicta regna et in partibus Germanie consistant/ tamen tibi abbas monasterii in Esrom ut patri abbati iuxta consuetudines et instituta regularia eiusdem ordinis per sedem apostolicam ex certa sciencia approbata subesse noscuntur/ uos et etiam successores uestros abbates in Esrom et in Sora dicti ordinis Roschildensis diocesis monasteriorum qui erunt pro tempore et uestrum ac eorum quemlibet coniunctim et diuisim uicarios et uisitatores omnium huiusmodi in ipsis regnis consistencium ac in Colbatz et in Hilda monasteriorum presenti scismate durante dumtaxat deputare necnon alias in premissis salubriter prouidere de speciali gracia dignaremur/ ♦ Nos igitur cupientes/ quod idem ordo ad quem gerimus specialem deuocionis affectum etiam in regnis predictis salubriter regatur et fideliter gubernetur/ et eciam attendentes predicte regine singularis deuocionis affectum quem ad nos et eandem ecclesiam non absque ingentis laudis preconio habere dinoscitur et ut huiusmodi eius deuocio eo feruentius augeatur quo peticiones suas senserit per nos fauorabilius exauditas ac eciam de uestris industria et probitate gerentes in domino fiduciam specialem huiusmodi supplicacionibus inclinati uos et eosdem successores uestros canonice intrantes pro tempore coniunctim et diuisim uicarios generales predicti ordinis in regnis necnon in Colbatz et in Hilda monasteriis antedictis scismate predicto duntaxat durante auctoritate apostolica tenore presencium constituimus et eciam deputamus dantes et concedentes uobis plenam et liberam potestatem congregandi generale uel prouinciale consilium dicti ordinis pro tempore in regnis antedictis duntaxat necnon uisitacionis officium exequendi in consistentibus in regnis antedictis ipsis ac in Colbatz et in Hilda monasteriis antedictis/ necnon de statu monasteriorum huiusmodi utriusque sexus et obseruanciis regularibus in eisdem diligenter inquirendi et eadem monasteria in capitibus et in membris tam in spiritualibus quam in temporalibus reformandi et que corrigenda inibi uideritis corrigendi iuxta predicti ordinis regulam et apostolica instituta non secundum normam praue consuetudinis que quasi pro lege in quibusdam monasteriis ut asseritur inoleuit/ necnon monachos et moniales siue huiusmodi personas utriusque sexus presentes et posteros in eisdem monasteriis degentes/ quos contumaces inueneritis et rebelles iuxta modum culpe uice nostra regulari censura percellendi absque personarum deletu non parcendo rebellibus ob suam pertinatiam uel potenciam amicorum necnon omnia alia et singula faciendi gerendi et exercendi in consistentibus regnis ipsis et in Colbatz et in Hilda monasteriis prefatis que ad huiusmodi uicariatus officium pertinent et que uicarius generalis dicti ordinis existens pro tempore in eisdem facere gerere et exercere posset in generali capitulo predicti ordinis cum quatuor primis iuxta predicti ordinis instituta necnon disponendi in omnibus et per omnia prout in hiis et circa ea necesse fuerit ac uobis et successoribus ipsis pro tempore uidebitur expedire et secundum huiusmodi consuetudines et instituta per eandem sedem ut premittitur approbata/ constradictores quoque per censuram ecclesiasticam auctoritate apostolica appellacione postposita compescendo/ non obstantibus premissis et aliis statutis et consuetudinibus dicti ordinis contrariis quibuscunque/ seu si aliquibus communiter uel diuisim a sede apostolica sit indultum quod interdici suspendi uel excommunicari non possint per litteras apostolicas non facientes plenam et expressam ac de uerbo ad uerbum de indulto huiusmodi mencionem/ ♦ Nos enim sentencias quas uos aut dicti successores pro tempore rite tuleritis in rebelles ratas habebimus et gratas et faciemus auctore domino usque ad satisfactionem condignam inuiolabiliter obseruari/ ♦ Datum Rome apud sanctum Petrum quinto nonas iulii anno quartodecimo/