We scepenen, geswoyrn, rentmeesteren, dekenen van den ambachten, een deel der goeder knapen ende al die gemeyn stat van tsHertoghenbosch doin cont allen luden, dat wy overmids gemeynen orbaer ende profiit onser voerscreuen stat geraempt ende geordineert hebben die punten hierna bescreven.
<1-6>.....
<7> Item want voel oncosten vallen ende eede werden geswoyrn van menicherhande goede, dat ghecoft wordt ende vercoft buten lands, et sy ¹ van laken of van enicherhande anderre waren, het sy ² op Schoenen oft in Pruyssen oft tot Vranckenvoert, oft waer dat sy, dat men daer enghenen ciins afgheven en sal, indien dat die comenscap gevallen sy op gheen side van den Crommen Wyel van Werkendamme ende voert totter borch toe van Nymeghen ende op gheen side van den Grave ende also voert tot van Cattenryt ende vandaer voert tot Tuernouder toe ende so voert wederom tot den Crommen Wyel toe. ♦ Ende so wie des nyet en hielde ende daeraf becoert worde, die sals wesen op drie pont payments, ende die te deylen als voerscreven is.
<8-10>.....
Ende omdat wy willen, dat dese voerscreven punten alle ende een yegelike vast ende stede eweliken gehouden sollen werden, so hebben wi den groten segel onser voerscreven stat aen desen brief doin hanghen. ♦ Dit was gedaen int iaer ons Heren dusent vierhondert ende drie op sunte Mathiis avont ³ des apostels.