Na dem grute ♦ Leuen hern vnde vrunde ♦ Wy don iw to weten dat wy werliken vornomen hebben dat de Denen hebben geuangen her Iohan van P{ue}tten vnd her Curd Leczkowe vnd holden se geuangen to Calmaren in deme torne/ vnd Stolle de mit en gesegelt was hebben se her gesandt vnd de brochte enen bref van en dem kompthur van der Balige biddende den kompthur dat he wolde scryuen her Abraham Broderssone dat se mochten vp ere truwe gan. vnde mochten teen to den steden de in Denemarken sint wante vnse here de homeister see heuet vtgesandt an de stede mit en touorramene enes^{* 1} vredes tusschen der konynginne . vnd vnsen hern ♦ Ok sante her Abraham mit syme denere dem kumpthur van der Balige enen bref begerende dat he wolde senden ii riddere vnd ii erbar manne an de koningynne ok touorramene ens vredes vnd solde ok in veligen dagen stan alle de wyle dat de boden vte weren. ♦ Dat duchte vnsen heren vnd vns nycht nutte sin sint dem male dat de huskumptur van Danczik mit den sendebode n an de konynginne getogen sint vmme des suluen vredes willen touorramende vnd nv wy ok mit ganser macht vor dem slote liggen Goltborch genomet ♦ Item vort so wetet dat de komptur van der Balige wil scryuen her Abraam dat he wille her Iohan vnd her Curde mit eren deneren laten vp ere truwe gan vnd dar wil he gud vor sin dat se holden solden. ♦ Wille gy icht dat wy hir by dun sullen dat moge gy vns scryuen ♦ Desse tydinge hebben wy vp dessen dach ♦ Got sy mit iv ♦ Gegeuen vor Goltborch up Gotlande des vrydages Iohannis baptiste.