Omnibus presentes literas inspecturis frater Ericus confessor generalis monasterii beate Marie uirginis et beate Birgitte in Wazstena salutem in domino ♦ Nouerint uniuersi quorum interest. quod exhibitor presencium dominus P. Iohannis quondam notarius domine Yde. de Glathsaxa. nobis pro duobus libris reuelacionum. uidelicet sexto et septimo. per quendam fratrem predicti monasterii nostri fratri Nicholao conuentuali Ystadensi ordinis fratrum minorum Lundensis diocesis olim concessis. deinde per predictum fratrem .N. predicte domine Yde concessis in manusque eiusdem domini Petri. tunc notarii. per ipsum fratrem N. traditis predicte domine allaturis. eidem fratri fideliter reportaturis. ad omnimodum beneplacitum nostrum integraliter satisfecerat maxime quia idem Petrus uersus Alamaniam nauigio transiens post mortem predicte domine Yde. Romam uisitaturus libros prelibatos gracia faciendi illos in Alamania transscribi. in naui secum habens per nimiam contrarii uentus tempestatem. eadem naui in partes minutissimas dissoluta et confracta. omnibusque mercimoniis et rebus aliis in profundum submersis in illa contentis prope portum Prutenorum dictum Balgha. asseruit ueraciter eciam tunc ¹ prochdolor esse. perditos et submersos ♦ Quapropter predictos fratrem N. et dominum Petrum Iohannis presbiterum ab omni ulteriori predictorum librorum restitucionis satisfactione nobis seu successoribus nostris decetero facienda. quittos ac penitus liberos dimittimus per presentes/ sigillo conuentus nostri caudatenus appenso roboratas ♦ Datum Wazstena anno domini mcdiiii. in uigilia beati Laurencii martiris.