Innocentius etcetera dilecto filio .. abbati monasterii in Pudegloue Caminensis diocesis salutem etcetera. ♦ Dignum arbitramur etcetera. ♦ Exhibita siquidem nobis nuper pro parte dilecti filii Henninghi Seghebode clerici Roskildensis diocesis peticio continebat quod olim parrochiali ecclesia uille Lancken dicte diocesis quam quondam Andreas de Essen ipsius ecclesie rector dum uiueret obtinebat per ipsius Andree obitum/ qui extra Romanam curiam decessit uacante/ dilecti filii nobiles uiri Barnim et Wartislaus fratres duces Stetinenses ueri patrini ipsius ecclesie et existentes in pacifica possessione uel quasi iuris presentandi rectorem ad ipsam ecclesiam eundem Henninghum uenerabili fratri nostro Petro episcopo Roskildensi ad eandem ecclesiam sic uacantem infra tempus legitimum presentarunt sed idem episcopus dictum Henninghum in ipsa ecclesia instituere contra iustitiam denegans/ dilectum filium Steyslaum de Osten clericum dicte diocesis/ qui se per quosdam alios laicos quos ipse Steyslaus ueros patronos eiusdem ecclesie et in simili possessione uel quasi existere licet falso asserebat ad eandem ecclesiam sic uacantem etiam infra tempus legitimum presentatum fuisse in eadem ecclesia auctoritate ordinaria instituit quamuis de facto/ quare pro parte prefati Henninghi nobis fuit humiliter supplicatum ut ipsum in rectorem dicte ecclesie instituere/ de benignitate apostolica dignaremur/ ♦ Nos igitur de premissis certam noticiam non habentes ac uolentes dictum Henninghum qui ut asserit ex utroque parente de militari genere procreatus existit apud nos de nobilitate generis uite ac morum honestate aliisque probitatis et uirtutum meritis multipliciter commendatum horum intuitu fauore prosequi gracioso discrecioni tue cum prefatus Henninghus ut asserit propter potentiam et maliciam dictorum laicorum qui eundem Steyslaum ut premittitur presentarunt non speret se super premissis in ciuitate Roskildensi seu dicta diocesi posse consequi iusticie complementum/ per apostolica scripta mandamus quatinus si uocato dicto Steyslao et aliis qui fuerint euocandi presentacionem huiusmodi de dicto Henningho ut premittitur factam fore canonicam et de persona ydonea celebratum/ ac per diligentem examinacionem/ dictum Henninghum bene legere bene construere et bene cantare ac congrue loqui latinis uerbis et alias ydoneum ad dictam ecclesiam obtinendum esse reppereris uel etiam si ipse Henninghus non bene cantaret dummodo in tuis manibus iuret ad sancta dei euangelia quod infra annum a tempore examinacionis huiusmodi computandum bene cantare addiscet super quibus tuam conscientiam oneramus/ prefatum Henninghum in rectorem dicte ecclesie cuius fructus redditus et prouentus sexdecim marcharum argenti puri secundum communem extimacionem ualorem annuum ut idem Henninghus asserit non excedunt auctoritate nostra instituere procures/ inducens per te uel alium seu alios eundem Henninghum uel procuratorem suum eius nomine in corporalem possessionem ecclesie predicte iuriumque et pertinenciarum predictorum eiusdem/ et defendens inductum amoto exinde dicto Steyslao et quolibet alio illicito detentore/ ac faciens sibi de ipsius ecclesie fructibus redditibus prouentibus iuribus et obuencionibus uniuersis integre responderi/ contradictores auctoritate nostra (appellacione postposita compescendo) ¹ non obstante si episcopo Roskildensi pro tempore existenti uel quibusuis aliis communiter uel diuisim a prefata sit sede indultum quod interdici suspendi uel excommunicari non possint per litteras apostolicas non facientes plenam et expressam ac de uerbo ad uerbum de indulto huiusmodi mencionem/ ♦ Nos enim si dictus Henninghus ad hoc repertus fuerit ydoneus ut prefertur/ exnunc perinde irritum decernimus et inane si secus super hiis a quoquam quauis auctoritate scienter uel ignoranter contigerit attemptari ac si die date presencium eundem Henninghum ad hoc repertum ydoneum in rectorem dicte cum interposicione decreti institui mandauissemus. ♦ Datum Rome apud sanctum Petrum decimo kalendas februarii anno primo/