Post salutacionem ♦ Hochgeborne clare vorstinne ♦ Alse iuwe herlicheit wol vornomen heft van deme dage des wi vorramet hadden to holdende to Lubek vp vnse vrouwen dach to lichtmissen negest geleden des heft sik dat van mennigherhande inualles vnde geschechtes wegene getoghert alse dat wi vp desse tiit sint erst tosamende. komen vnde hebben wol mank anderen degedingen gesproken vmme de schelinge. de is twusschen iuwer herlicheit vnde dem heren homeister to Prussen vmme dat land Godlande vnde vmme de stad Wisbu. also dat wi vmme des menen besten willen mit den sendeboden van Prussen de des heren homeisters macht dar to hebben alse wi van en vornemen gesproken vnde eens dages geramet hebben mit iuwer herlicheit to holdende to Schonore to pinxten negest komende dar de here homeister de sine bi hebben wil alse wi van den suluen sendeboden berichtet sind ♦ Hiir vp mach iuwe herlicheit des besten ramen vnde dar to vorboden de ghenne de iuwer herlicheit nutte vnd behof dunket dar by to komende vp dat des heren homeisters boden dar nicht vorgheues komen ¹ ♦ Vnde bidden des iuwe antworde vnuortogherd. dat wi dem heren homeister scriuen mogen wente he sine boden nicht vdsendende wert eer he van vns en antworde heft ♦ Vortmer alse iuwe herlicheit ok wol mit vnses rades kumpanen to worde was vmme enen anderen dach vor dem daghe mit vns to holdende alse vmme vnser ² borghere schaden zeevunt m{uv}nte vnde vmme andere gebrek darumme mit iuwer herlicheit wol eer gesproken is. mene wi eft id iuwer herlicheit bequeme is eenen dach to holdende darsulues to Schonore des sondages vor vnses heren hemmeluard negest komende ♦ Darumme wi iuwe herlicheit bidden mit allem vlite dat gi de genne dar to vorboden de gi wol weten de wi in schuldeginge holden./ alse wi wol eer iuwer herlicheit de to kennende geuen hebben/ ♦ Vnde dat wi iuwer herlicheit dar van nicht eer gescreuen hebben des is sake alse vorscreuen is also dat wi nicht eer tosamende komen konden ♦ Mit allem vlite biddende da gi desto nenem vnwillen nemen ♦ God almechtichen beware iuwe grotmechtigen ³ herlicheit ♦ Screuen vnder vnser stad Lubeke ingesegel des wi sament hir to gebruken des sonnauendes vor reminiscere m cccc v ⁴ .