Eerwerdigen in gode vedere vnde heren ♦ Iuwen bref ^a an vns gesand bi dessem boden hebbe wi wol vornomen vnde alse gi scriuen van dem dage den wi hir to Lubeke to lichtmissen negest geleden scholden gehalden hebben des heft sik dat van mennigherhande inualles vnde ghescheftes wegen getogert also dat wi vp desse tiid sind erst to samende komen vnde hebben mit den sendeboden vd Prussen enes daghes gheramet vmme de schelinge de is twuschen dem hochgeborenn ¹ fursten vnde vorstynnen koning vnde koninginnen der rike Denemarken Sweden vnde Norwegen up de ene side vnde deme heren homeister to Prussen up de andere syide vmme dat land Godlande vnde de stat Wisbu up pinxten negest komende to Schonore to holdende ok hebbe wi sundergen geramet mit der hochgeboren vorstynnen der vrowen koninginnen eenes daghes dar sulues to holdende des sondages vor vnser heren hemeluard dage negest komende vmme sodanne schelinge de wi to eer vnde to den eren hebben alse de vrouwe koninginne iw des wol berichten mach darumme wi bidden dat gi mit eer spreken vnde raden dat vns een vnuortoghert antworde werde dat wi dem heren homeistere scriuen mogen dat he sine sendeboden dar denne hebbe God almechtich beware iw ♦ Screuen vnder der van Lubeke secret des wi sament hir to bruken des sonnauedes vor reminiscere int iar mccccv.