Demutige beuelunge etcetera ♦ Allirdurchluchste forstinne vnd grosmechtige gnedige frauwe ♦ Noch inhaldunge vnser antwert die wir euwern gnaden bey euwern bothen letzt briflich taten als von czu sampnekomunge etzlicher vnser gebitiger vnd der eldesten vnser stete zo synt sie off deze czeit bey vns gewest vnd haben mit in gehandelt euwer begerunge vnd willen als von des tages wegen vnd ouch euwer antwert von dem genomen gute etcetera ♦ Grosmechtige gnedige frawe czu euwer behegelichkeit welle wir den tag gerne halden vnd vnsere sendebothen in den Oresund volmechteclich senden ab got myt synen gnaden noch helfen welde als wir genczlich hoffen das die sachen czwisschen vns beyderseit fruntlich mochten geflegen werden sunder allirdurchluchste forstynne off das vnsere sendebothen off den tag vmbsost nicht czyen als sie leczt taten zo geruchet vns mit euwern bryfen gewis czu machen ab euwer hochwirdikeit ader der hochgeborne vnser herre konig Erich ader imand anders czu dem selben tage queme ader geschicket wurde von euwerm teyle das die volmechtig sien von euwir wegen czu thun vnd czu lassen in allerweyse gleich den vnsern vnd off euwer gnaden ader den vorgeschreben vnsern herren konige ab ir beyderseit czu dem tage nicht quemet die sachen vnd teidungen nicht schiben dorfen vnd nemelich bitte wir euwer konicliche gnade demuteclich das ir gnedige frowe durch got vnd des rechten wille das genomene gut vor allen teidingen ee man keyne sache handelt den vnsern die czu dem tage komen genczlichen antwerten vnd wederkeren lasset ir wisset io das das selbige gut bynnen gutem geloben genomen ist vnd bis her enthalden was were is denne nutcze an czu slahn ander teidinge den vnsern geschege denne czu vor gleich vnd redelichkeit vm das ire vor den angehaben teidingen ♦ Vortme als euwer grosmechtikeit schribet von der sicherheit vnd fredebrife den vnsern czu geben das die vnsern euch allewege willekomen gewest syn vnd wol weder czu vns komen etcetera das bekenne wir vnd danken euch das als vnser besunder genedigen frawen alleyne wir das sunder czwiuel wissen das die vnsern fredelich vnd sicher von euch vnd vnserm herren dem konige euwerm czone czyhen vnd weder czyhen mogen zo begeren wir doch der sicher brife in ander weise nicht wen vor den ienen die durch euwer gnade wille thun vnd lassen wellen off das die vnsern deste fredelicher durch komen vnd bitten noch gancz begerlich dorumme vnsern sendebothen eynen semelichen fredebrieff von euwern gnaden czu senden vnd geruchet vns gnedige frawe hir off eyne gutliche vnd vnuorczogene antwert czu schriben bey desem vnserm bothen ab irs alzo mit vns vnd den vnsern vnd irem gute halden wellet als vorgeschrben ist zo wellen wir den tag in dem Orsund czwischen paschen vnd phyngsten ader off phingsten off eyne sulche czeit als is die vnsern gereichen mogen gerne vorliben ♦ Gegeben off vnserm huse Marienburg am sonobende vor reminiscere in de xiiii^c vnd vii^den iore.