Vnsen vrundliken willen der behegelicheit vorscreuen ♦ Ersame leue vrund ♦ Alse gi vns gescreuen hebben van enem dage den iuwe homeister guder dechtnisse mit der hochboren furstynnen vrowe Margareten konigynnen van Denemarken geramet hadde etcetera van vns begherende dat wi de vnsen den de degedinge witlik sin to dem suluen dage senden willen in den Orsund achte dage na pinxsten negestkomende dar up willet weten dat de gemeene stede van der hense vmme de tiit vten hir in vnser stat eene dachuart holden werden also dat wi sere vnleddich werden wesen vm der suluen dachuart vnde ok vm vele anderer zake willen ♦ Iodoch wille wi iuw hir van binnen kort vnsen willen bi vnsen egenen beden wol scriuen willet ok dessen iegenwardigen iuwen boden nicht vorkeren dat he eene wyle hir toghert is wente he dar nene schult ane heft men wi konden ene nicht eer vorderen ♦ Screuen vnder vnsen secrete des mandages na vocem iocunditatis mccccvii.