Wy Bischop Iohan, van ghodes gnade bischop tho Sleswik, doon witlighen vnde openebare an desseme opene breue v{oe}re alle de iennen, de nu zin edder noch to komen moghen, dat wy lathen loos vnde quit vnde vnsen rechten eruen vnde vnsen nakomelinghen deme erbaren Ridderen Niels Yversson van Heferyngholm vnde synen rechten eruen sunder alle arghelist edder nye vunde dar in tho tynde, ze sin gheystlich edder werlich, als vmme Henneke Stampen vnde vmme alle dingh, dar he vte vnseme pantghod heft gheschattet edder vpgheboret, id sy broke edder rente, edder vnses stichtes ghut, dat dar licht in deme kerspele tho Swauestede, edder w{oe}r id licht in vnseme stichte, de wyle dat he her Niels voghet was vppe Swauestede, dat wy hebben im vnsen panden van vnser gnedighen vruwen weghene der herthogynnen van Sleswik, dat sich heten is dat kerspele to Ostenvelde. ♦ Vnde des to mere betugnisse vnde segherricheyt so hebbe wy Bischop Iohan vorbenomede vnse yngheseghele myd berademe mode ghehanghet lathen an dessen breff. De gheuen vnde screuen is na ghodes bord dusent iar veerhundert iar dar na in deme sevenden iare des vryedaghes neghest na sunte Bartholomeus daghe.