Vorsichtighen wiisen mannen borghermesteren vnde radmennen der stad Ripen wii borghermestere vnde radmanne der stad Hamborgh vruntliken gruth mid begheringhe alles gudes touorn ♦ Besunderen guden vrunde wii bidden iuw mid ganczer andacht dat gi Radeke Waghenmanne Ludeken vnde Iohanni van Tzeuen dessen breiffwiseren willen gunstich vnde behulpen wezen dat en tosamende oft enen isliken besunderen moghen antwerdet werden vmme reddelik arbeideslon allent dat ghereddet is van Arnd Zediken koghen de kortliken vor iuwer hauenne vor gan is an des schepes takele an ankeren kisten vnde matten vnde vitaligen deme schepe tobehorende ok wes gheberghet is van vi lasten heringhes van dessen twen merken (to bomærker). de een vnse borgher in den vorscreuen Arnd Zediken kogghen gheschepet hadde ♦ Vortmer ene tunne hosen van dessem merke dat hiir nascreuen is (bomærke) de in Tideken Iutten schepe schepet was welk schipp ok vor iuwer hauenne leider vorgaen is Leue vrunde ♦ Vnse borghere den de vorscreuen stukke anroerende sind beide van des schepes weghen ok van der vi laste heringhes weghen vnde der tunnen hosen hebben in vnser ieghenwardicheit vulle maght gheuen Radeken Waghemanne Ludeken vnde Iohanni van Tzeuen irghenomet alle de vorscreuen stukke to entfanghende vnde dar bi to doende vnde to latende oft vnse borghere dar sulue bi weren willet iuw hiir inne also vruntliken bewiisen also wii iuw wol to betruwen dat wille wii gheerne vorschulden wor wii moeghen wante gi schullen des ganczen louen vnde vullekommene to vorsicht to vns hebben dat wes den irghenomede Radeken Ludeken vnde Iohanni van den vorscreuen stukken antwerdet wert ♦ Dar schulle gi noch iemande anders nene namaninghe mer vmme liiden an tokomenden tiiden ♦ Des to tughe vnde merer sekerheit hebbe wii vnser stad secretum drukken laten vppe dessen breeff de gheuen is na godes bord verteynhundert iar dar na an dem soeueden iare des soendaghes vor aller hilghen daghe\