Henri par la grace de dieu roy Dengleterre et de France et seignur Dirlande.. As tresorer et chamberlains de nostre eschequier. saluz.. ♦ Come par laconte quel nostre chier et foial chiualer William Burghchier ad renduz deuant les barouns de nostre eschequier par vertue de noz lettres de priue seal a eux nadgairs direttes/ a cause du viage par le dit William fait. alant de nostre commandement as parties de Denmarke pur traiter ouesque Isabelle royne de Denmarke et de Norweye sur le fait de mariage parentre nostre treschier et tresame filz Henri prince de Gales. et la fille de Phelippe royne de Denmarke et de noz deniers par lui receuz par celle cause/ trouez soit que au dit William. sount duz par le dit aconte cent cynquante et noef liures tresze souldz et quatre deniers. sicome par le teneur du dif aconte. certefiez en nostre counsail pleine appiert/ ♦ Et come lauantdit William nous ait enfourmez que cent liures sount a lui dues et aderere dune annuitee de cynquante marcs par nous nadgairs a lui grauntee aprendre pur terme de sa vie a nostre eschequier susdit/ ♦ Volons et vous mandons que sibien de les susdictes cent cynquante et noef liures tresze souldz et quatre deniers/ come de ladite somme de cent liures/ en cas que a tante de somme soit aderere au dit William de sa annuitee susdite/ facez auoir a mesme celui William paiement ou sufficeant assignement sicome reson est.. ♦ Donne souz nostre priue seal a Westminster le .xviii. iour de feuerer. lan de nostre regne noesisme.