In nomine domini amen/ ♦ Ad perpetuam rei memoriam/ uniuersis Christi fidelibus quorum interest uel interesse poterit quomodolibet in futurum/ nos Petrus dei gracia episcopus Roskildensis liquere uolumus per presentes quod cum sacra teste scriptura ^a cuilibet prelacionis predito dignitate euellere/ destruere edificare et planttare/ diuinitus sit iniunctum in uinea siquidem domini Sabaoth Ihesu Christi dextera transplantata et inundacione uiuifici sui sanguinis fecundata/ <in> ¹ ecclesia uidelicet beate Marie uirginis Hafnis collegiata nobis lege diocesana subiecta absurdus ab olim inoleuit abusus quia ibi sompnolenta tepidorum ymmo torpidorum et negligentium ignauia officiose et deuote feruenter laborancium sedulitati compari premiorum participio penitus coequatur/ et labores sibi usurpatos depascitur alienos/ unde torpentis succrescentibus indeuocionis labruscis/ et uitalem uegetacionis humorem sibi attrahentibus deuotorumque cultura deserta uinea domini prochdolor sterilescit/ nos igitur ueteris morbi uepribus extirpatis ipsam domini uineam noue plantacionis antidoto excolere cupientes communicatis super hoc maturo deliberatoque consilio et consensu dilecti capituli nostri Roskildensis huiusmodi nostrum affectum plurimum approbantis/ distribuciones pro horis canonicis in dicta ecclesia Hafnensi aspirante nobis clemencia saluatoris de nouo fundamus instituimus et ordinamus secundum statuta et antequam ecclesie Roskildensis consuetudinem perpetuo duraturas/ quatinus os bouis in area domini triturantis post labores habeat quod ruminet/ et uberioris sustentacionis stipendia colligat unde uiuat/ ut sic circa diuina deuote feruentes deuotius ferueant ac tepidi continuis damni tediis affecti/ et spe maioris lucri excitati detorpeant euigilent et diuinitus incalescant pro quarumquidem distribucionem sustentacione debita actore domino perpetuo duratura bona nostra infrascripta uidelicet decimas episcopales allecium de piscacionibus uillanorum Haffn et habitancium in insula Amaghe/ item quendam fundum cum estuario wlgariter batstuwe in eodem fundo constructo Haffnis prope mare situatum item alium fundum predicto fundo contiguum quem de quodam Thrugoto emimus. item quandam curiam ibidem quam prius tenuit quidam skipper Ioseph ad occidentem apud cordigeros platea communi intermedia situatam/ item censum debitum de duodecim mansionibus carnificum ibidem in Byornebrogadæ sitis una cum omnibus et singulis dictorum bonorum attinenciis quibuscumque nominibus censeantur dilecto capitulo nostro Haffnensi in omnipotentis dei et gloriose uirginis Marie genitricis sue predicti loci patrone gloriam et honorem ac anime nostre et animarum omnium episcoporum Roskildensium remedium et salutem. inter uiuos donamus et tradimus/ ipsorumque bonorum proprietatem dominium et possessionem realem pleno iure assignamus et per presentes scotamus perpetuo possidenda/ ♦ Ut autem uia maliciis et controuersiis precludatur uolumus et sanccimus quod nullus pretextu cuiusuis occasionis aut iuris uel facti colore exquisito de prenominatis distribucionibus aliqualiter participet nisi qui in horis canonicis in choro et in habitu consueto personaliter sine fraude interfuerint secundum statuta et consuetudinem ecclesie Roskildensis. ♦ Item uolumus quod capitulum ecclesie Haffnensis predictum racione donacionis prelibate anniuersarium generale omnium episcoporum Roskildensium defunctorum precedencium et futurorum cum uigiliis nouem leccionum et missa pro defunctis semel annis singulis quando conueniencius fieri poterit solemniter celebrare perpetuo sit astrictum. ♦ In quorum fundacionis institucionis et donacionis euidentiam firmiorem presentes litteras sigillorum nostri et capituli nostri Roskildensis supradicti appensione fecimus roborari. ♦ Actum et datum anno domini m^o quadringentesimooctauo die beati Gregorii pape.