Reuerendis in Christo patribus et dominis. Magdeburgensi Lundensi. et Bremensi. archiepiscopis necnon Zwerinensi. Lubicensi. Hildensemensi Halberstadensi. Roskildensi Brandeburghensi Ratzeburgensi Hauelbergensi Sleswicensi et Ottoniensi episcopis ac uniuersis et singulis. monasteriorum prioratuum. ecclesiarum. tam cathedralium quam collegiatarum ac aliorum regularium et secularium ecclesiarum cuiuscumque seu quorumcumque ordinum existat. ceterorumque locorum. ecclesiasticorum. abbatibus. prioribus. prepositis. decanis. archidyaconis. scolasticis cantoribus. thesaurariis. precentoribus. archipresbyteris commendatoribus. officialibus. causarum. auditoribus. predicatorum minorum heremitarum sancti Augustini et beate Marie de monte Carmelio ordinum magistris ministris. custodibus. prioribus guardianis. canonicis rectoribus ecclesiarum uicerectoribus perpetuis uicariis. capellanis altaristis. mansionariis assisiis elemosinariis. notariis siue tabellionibus. publicis et clericis ceterisque personis ecclesiasticis religiosis et secularibus exemptis et non exemptis quibuscumque cuiuscumque status gradus ordinis uel condicionis existant quocumque nomine censeantur. Nicolaus dei et apostolice sedis gracia episcopus Caminensis. et commissarius ad infrascripta a sede apostolica specialiter d<e>putatus. ¹ salutem in domino ♦ Litteras sanctissimi in Christo patris et domini nostri domini. Gregorii diuina prouidentia. pape. XII. sua uera bulla plumbea cum filis seu cordula canapis more Romane curie bullatas sanas et integras ac prorsus omni uitio et suspicione carentes. nobis pro parte nonullorum opidanorum multorum opidi Sundensis Swerinensis dyocesis presentatas cum ea qua decuit reuerentia. noueritis nos recepisse tenorem qui sequitur continentes. ♦ Gregorius episcopus seruus seruorum dei uenerabili fratri Nicolao episcopo. Caminensi. salutem et apostolicam benedictionem. ♦ Sedes apostolica pia mater recurrentibus ad eam cum humilitate filiis post excessum libenter se propitiam exhibet et benignam. ♦ Exhibita siquidem nobis nuper pro parte nonnullorum multorum opidanorum opidi Sundensis Zwerinensis dyocesis petitio continebat quod cum contra prefatum opidum et in multis uillis eiusdem opidi dicte dyocesis nonnulla dampna et incendia illata fuissent ita quod multe ex uillis ipsis necnon homines ipsarum et mulieres in puerperio concremati et aliqui homines mutilati exstiterunt et cum protunc ignoraretur a quibus illa patrata fuissent. aliqui ex predictis opidanis sumpta occasione de premissis contra nonullos presbyteros dicti opidi tres ex eis horribiliter et inhumaniter interfecerunt et plures ceperunt et ad hec predicti opidani auxilium consilium et fauorem dederunt propter que excommunicationis et alias penas et sententias in talia perpetrantes inflictas incurrisse noscuntur quare pro parte karissimi in Christo filii nostri Erici Dacie Swecie et Norwegie regis illustris et opidanorum predictorum nobis fuit humiliter supplicatum ut opidanos predictos ab excommunicationis sententia ac aliis penis predictis quas propter premissa incurrerunt absoluere ac cum eis misericorditer agere de benignitate apostolica dignaremur. ♦ Nos igitur attendentes quod eiusdem sedis clemencia non consueuit penitentibus ueniam denegare huiusmodi supplicationibus inclinati fraternitati tue de qua in hiis et aliis specialem in domino fiduciam obtinemus per apostolica scripta committimus et mandamus quatinus eosdem opidanos si hoc humiliter petierint ab excommunicacionis et aliis sententiis et penis huiusmodi auctoritate nostra in forma ecclesie consueta ac uice dumtaxat absoluas iniunctis inde eis et ipsorum cuilibet sub uirtute iuramenti per eos prestandi quod similia de cetero non committent nec committentibus prebebunt auxilium consilium uel fauorem et quod nostris et ecclesie mandatis parebunt necnon ecclesiis et personis si quibus ob premissa sint obnoxii satisfaciant competenter ac pro tanto excessu penitentia salutari et aliis que de iure fuerint iniungenda prouiso nichilominus quod loco penitencie quam coram populo publice peragere tenentur eis ut alia opera pietatis exerceant de quibus tibi uidebitur et super quibus tuam conscientiam oneramus iniungas. ♦ Uolumus insuper quod hii ex opidanis predictis qui proprias manus interfectioni et captioni predictis apposuerunt ad sedem predictam uenire pro absolucionis beneficio teneantur ♦ Datum Arimini vii idus decembris pontificatus nostri anno secundo. ♦ Post quarumquidem litterarum apostolicarum presentacionem recepcionem publicacionem et examinacionem pro parte dictorum opidanorum Sundensium fuit nobis humiliter et deuote supplicatum. quatinus ad dictarum litterarum apostolicarum et in eisdem contentorum execucionem procedere dignaremur eosdem opidanos Sundenses qui ad interfectionem trium et ad captionem plurium aliorum presbyterorum in opido Sundensi predict<o> ² perpetratas et commissas auxilium consilium et fauorem dederunt ab excommunicacionis et aliis sententiis et penis quas propter premissa predicti opidani incurrisse noscebantur absoluendo nos autem uolentes litteris ac mandatis apostolicis humiliter obedire sicud debuimus et tenemur eosdem opidanos Sundenses qui ad huiusmodi presbyterorum interfectionem et captionem auxilium consilium et fauorem dederunt ab excommunicacionis et aliis sententiis et penis talia perpetrantibus inflictis auctoritate apostolica nobis in hac parte commissa in forma ecclesie consueta in nomine domini absoluimus ac gremio sancte matris ecclesie restituimus iniunctis ipsis et ipsorum cuilibet omnibus hiis que pro tanto excessu et pro penitentia salutari secundum continenciam predictarum litterarum apostolicarum fuerant iniungenda ♦ Quocirca ad uestrum omnium notitiam premissa deduci et peruenire cupientes sinceriter in domino rogamus et exhortamur. quatinus dictos opidanos Sundenses omnes et singulos qui auxilium consilium et fauorem predictis interfectioni et captioni dederunt quos sic ut prefertur auctoritate apostolica absoluimus absolutos et gremio sancte matris ecclesie restitutos et amplius a christifidelibus in diuinis non euitandos sicut et nos ipsos non uitamus habeatis et teneatis ac haberi et teneri faciatis ipsosque in caritate spiritus sancti et communione sancte ecclesie confouentes huiusmodi absolucionem restitutionem et omnia premissa uniuersis christifidelibus intimari publicari et propalari curetis. ♦ In quorum omnium et singulorum premissorum euidens testimonium atque fidem presentes nostras litteras seu presens publicum instrumentum exinde fieri et per Andream Aurifabri et Hinricum Oldenborch notarios infrascriptos subscribi et publicari mandauimus nostrique sigilli maioris appensione iussimus communiri. ♦ Datum et actum in predicto opido Sundensi Zwerinensis dyocesis. in domo habicationis discreti uiri Lamberti Polemann opidani Sundensis. sub anno domini millesimo quadringentesimo nono indictione secunda mensis aprilis die uicesima tercia hora terciarum uel quasi pontificatus sanctissimi in Christo patris et domini nostri domini Gregorii diuina prouidentia pape duodecimi anno tertio presentibus honorabilibus uiris dominis magistro Nicolao Kummerow baccalario in decretis magistro Iohanne Poleman Hinrico Sachteleuent. Hildebrando Nyenkerken. Iohann<e> ³ Sanczebur presbyteris dicte Zwerinensis dyocesis testibus ad premissa specialiter uocatis et rogatis.