Ik Pridbern van Pudbuske riddere bekenne vnde betyghe openbare in desseme breue dat ik myt mynen rechten eruen vorkoft hebbe vnde vorkøpe deme erebaren in gode vadere vnde heren biscop Petere biscop to Roskilde vnde zinen nakømeren vnde eruen alle ere rechtigheit de ik kofte in der greuesschop vnde gharden vnde guden to Streye van vrowe Offemyen greuinne to Nouwgharde vnde van erer suster vrouwe Elzebe iunghe her Henninges dochtere myt aller rechtighet vnde tobehøringhe alze acker wissche weide holtughe moer \ vischwatere nat vnde drøghe dat hogheste myt deme sidesten myt alleme heren rechte ghestlik vnde werlik nichtes utghenomen vor ver dusent lubessche marc penninghe alzo binnen der stat to deme Sunde ghenghe vnde gheue zint. vnde schal dat eme entvrigen vor alle ansprake alzo in dem lande en recht is mit zo daneme vndersche were dat dat deme vorbenomeden bisscop Petere vnde zinen nakomeren vnde eruen aff ghinghe myt rechte zo schal ik vnde myne eruen eme edder zinen nakomeren vnde eruen de vorscreuen penninghe weddere gheuen binnen der stat to Roskilde en iar dar na uppe ener sekeren stede ♦ Vortmer heft de vorbenomede biscop Peter vullenkomenemacht in to lozende vnde to sik to køpende wes de iunghe her Henningh vnde bisscop Woldemer dar van vorsettet hebben vnde ik na zint ik dat hebbe haet ♦ Io doch zo beholde ik vnde mynen eruen in der vorbenomeden rechtighet greuesscop gharden vnde guden to Streye den ewighen wedderkop van des vorscreuen biscop Peters nakomeren vnde eruen edder we dat gut vorbenomet denne in siner were heft vor zo vele penninghe alzo hir vorscreuen steit vnde ok in den guden de se inne løset werden alzo hir vorscreuen steit. ♦ Vortmer schal ik vnde myne eruen desse vorscreuene rechtigheit nicht inløzen vnde wedderkøpen bi desses vorbenomeden bisscop Peters leuende vnde vieff iar na sineme dode. dar na welke tiid ik vnde myne eruen de vorscreuenen rechtegheit in der vorbenomeden greuesscop vnde gharden vnde guden to Streie van deme vorbenomeden biscop Peters nakømeren vnde eruen edder we dat gut in siner were heft wedder inløzen vnde køpen willen zo schal ik vnde myne eruen dat van zinen nakomeren vnde eruen edder de dat gut denne in der were heft wedder inløzen vnde køpen vor veer dusent lubesche mark also hir vorscreuen steit bynnen der stad to Roskilde vppe ener sekeren stede to betalende in eneme summen vnde uppe ene tiid. ♦ Item were dat de vorbenomede biscop Peter wes in ghelozet hedde vnde zik koft van den guden in der vorbenomeden greuesscop gharden vnde guden to Streie alzo hir vør screuen steit dat scal ik vnde myne eruen van zinen nakomeren vnde eruen edder we dat in der were heft uppe de suluen tiid alzo myt den veer dusent marken vørescreuen wedder inløsen vnde wedder køpen vor zo vele penninghe alzo de breue utwisen de dar med inne løzet werden vnde zo schal alle de vørscreuene rechtigheit vnde g{uo}de wedder komen to my vnde to mynen eruen vrye vnde vnbeworen ♦ Item heft desse vorbenomed biscop Peter vullenkomene macht to buwen de in deme vorbenomeden houe vnde cappellen to Streie uppe hundert marc lubesche in zo daner wies were dat he buwede uppe hundert lubesche marc de hundert marc schal ik vnde myne eruen zinen nakomeren vnde eruen edder we dat gut vorscreuen in der were heft wedder gheuen were ok dat dat hogher leppe dat he buwet hedde wen hundert lubesche mark dat schal my vnde mynen eruen to komen ♦ Item were dat deme vorbenomeden bisscop Peterduchte dat he vnde zine eruen vnde nakomere nicht en noch vor waret were in desseme breue uppe dessen vorscreuenen kop zo schal ik vnde wil eme enen anderen gheuenn dar eme vnde my dunket dat he vnde zine eruen vnde nakomere ane vor waret zi uppe dene suluen vorscreuenen kop io doch my vnde mynen eruen den ewighen wedder kop dar inne to beholdende alzo vorscreuen steit ♦ To merer bewaringhe vnde groterer bekantenisse hebbe ik myn inghezeghel myt der erebaren lude inghezeghele alzo her Anders Ieppessen her Clawes Grubendal her Vicke Smeker her Erik Tamessen her Hinrik Daa her Peter Neghelsun van Woldorpe riddere Hartwich Tralouwe Alard Tzarnyn knapen de vmme myner bede willen to ener witlicheit vnde tughenisse ere ingheseghele myt witscop vnde myt ia by myn ghehenghet hebben vor dessem dreff de gheuen vnde screuen is to Roskilde na godes bord veerteyn hundert iar in deme teyneden iare des dingzedaghes to paschen.