Witlik vnde openbare zy alle den iennen de dessen bref zeen horin edder lezin alzo vmme dat schip dat dar blef vnder Godlande dat schipper Peter Br{uo}n vorede god zy is geclaghet vnde dar ik Hinrik Zomerman to Reuele mede ynne hadde twoo tonnen werkes de gode vnde my to horden ♦ Desse twey tonnen werkes voregescreuen heft my de erbare man Iusse Eriksson volghen laten vmme møghelik berghe ghelt des danke ik Hinrik Zomerman vorbenomet deme hogh gheboren v{uo}rsten van godes ghenaden konynk Erik ouer de drey ryke also Sweden Dennemarken vnde Norwegen myme genedighen heren vnde der hogh gheboren v{uo}rstynne vrouwen dar neghest danke ik deme erbaren manne I{uo}sse Eriksson mynes ghenedighen heren des konynges voghet vp Godlande de my zynen guden willen wol bewiset heft in alle dessen zaken vorgescreuen ♦ Vor desse twey tonnen werkes geloue ik Hinrik Zomerman vorbenomet myt mynen rechten eruen myme ghenedighen heren deme konynghe vnde ok myner ghenedighen vrouwen der kønigynnen vnde dar neghest I{uo}sse Eriksson vnde zynen rechten eruen vor alle na manynghe to ewighen tyden vnde holde dat stede vnde vaste in tokomenden tyden zunder ienigerleye arghelist vnde hulpe rede ♦ To eyner merer bet{uo}chnisse desser vorghescreuen zake zo hebbe ik Hinrik Zomermann gebeden de erbaren lude also her Herman Munter her Hinrik Katte vnde her Herman Vrydach ratlude to Wysb{uo} vnde schipper Iohan B{uo}rgher dar z{uo}luest dat ze ere inghezeghele myt deme mynen hebben vor dessen bref gehanghen de gegheuen vnde ghescreuen is to Wysb{uo} des dr{uo}dden zundaghes na paschen in deme iare vnses heren Ihesu Christi virteynhundert vnde teyn iare\