Post salutacionem. ♦ Allerlutterste vorste, hogheborne leve gnedige here. ♦ Iuwen konynchliken gnaden beghere wy to wetende, dat de eddelse hoghgeborne here, greve Hinrik van Holsten, Stormeren unde Schowenborch, heft zine merkeliken unde erbaren sendeboden by us gehat, de us ghekundighet heben, wo gi iuwe konyncliken ungnade tiegen den erbenomeden greven Hinrike unde des irluchtigen vorsten unde heren, hern Gherdes saligher dachtenisse, ichteswanne hertogen to Slezwik, zines broders, kinderen ghekert hebben, zunder ere schult, also wy vorstan hebben. ♦ Bidde wy, leve gnedige ¹ here, iuwe gnade also wy odmodigest moghen, ist, dat iuwe gnade ienigherhande mysheghelcheit oft ungnade tieghen de erbenomeden eddelen heren, greve Hinrike unde zines broders kinderen vorscreven, heft, dat gi umme unser odmodighen bede willen en zameliken unde besunderen de willen gutliken tu hulden unde to gnaden wedder keren. ♦ Dat wylle wy gherne vordernen etcetera.