Post salutacionem. Besunderen leven vrunde. Willet weten, dat de ersam here Claus Voghe, iuwer stat borghermester tom Sunde, heft us to kennende gheven, wo gi unde use vrunde, de rad to dem Gripeswolde, iuwes rades kumpen menen kortliken to sendende mit dem heren hertoge Warcslave to dem heren konynge van Denemarken. Bidde wy iuwer leve andachtliken, dat gi den zulven iuwes rades kumpen mede bevelen willen, dat se mit dem erghenomeden heren konynghe spreken unde handelen wyllen van der menen stede weghen umme de munte in Denemarken unde umme mengherhande gebreke, de dem kopmanne in den dren riken weddervaren, welke gebreke iuwe wisheit wol irkant, bet wan wy iw nu tor tid screven konen. Dar up sende wy iuwer leve unsen bezeghelden bref van geloven, gescreven an den heren konyngh, welkes breves utscrift wy iw senden hir ane besloten van worden to worden, up dat iuwes rades kumpen duste bet zik dar na richten moghen. Weret dat se alrede utezegheld weren, bidden wy, dat gi en den bref nasenden, scrivende en ok iuwe guddunket up dat werf vorscreven. D{uo}chte en ok, wan se dat vorscreven werf vor dem heren konynge vortgesettet hebben, dat dar vurder enes anderen dages not unde behuf to zy, konen se denne enes legheliken daghes dar ane ramen, vormode wy us, dat de stede, den de dagh beleghen is, den nicht afleggen. Bewisende iw hir ane, leven vrunde, umme unser bede wyllen also vruntliken, also wy wol weten, dat gi gherne don. Dat wylle wy vordenen, wor wy moghen. Siit gode bevolen. Screven etcetera.