Weten scholen gy hoch[g]eboren vorsten konynch Erik der rike Denemercken Sweden Norweghen dat wy Elysabet hertochynne tho Sleswich greueynne tho Holsten unde Stormern etcetera willent iuwe vient wesen unde alle iuwer manne unde undersate umme des groten unrechtes willen dat gy unde iuwe hoftluude uns unde unsen kynderen unde unsen mannen unde unsen undersaten ghedan hebben ♦ Ok wetet dat wy unse unde unser kindere manne alle dar tho mechtich syn dat sy alle iuwe vient wesen wilt unde iuwer manne unde iuwer undersaten umme des unrechtes willen dat gy uns ghedan hebben als hir vorscreven is unde willen des alle unse ere sy mit uns unde wy mit een teghen iu vorwart hebben unde teghen den iuwen ♦ Ghescreven tho Gottorp in sunte Uitus auent beseghelt under unsen ynghesegel des wy alle bruken wy mit en unde sy mit uns tho desser tid.