Wy Erik, van godes gnaden der ryke Dennemarken, Sweden, Norweghen, der Wende unde der Ghoten konynk unde hertoghe to Pomeren, duen witlik in desseme unsen breve, dat wy de borghermeystere, raedlude, borghere unde de ghantzen menen koplude van Bremen laten vrych, quied, leddich unde loes vor alle namanynghe van des schepes unde ghudes weghene, dat unsen borgheren nomen ward van Stokkesholm. Des tho ener witlicheit so hebbe wy unse ingheseghel henghen laten vor dessen breff, de gheven is tho Vlensborch na godes bord duzent jar verhundert jar in deme teynden jare darna in sunthe Mertens daghe.