Wy Erik van godes gnaden herteghe to Sassen. vnde wy Elizabeth van der suluen gnaden greue Claweses dochter. de greue to Holsten was. vnde herteghinne to Sassen bekennen vnde betughen in dessem vnseme openen breue dat wi van rechter schult weghene. schuldich sint. der allerdorluchtigesten vorstinnen vnde vrowen desses breues wisere koninghinnen Margareten. koning Waldemars deme got gnedich sy der denen koninghes dochter. dredusend lubesche mark in guden witten penninghen alse nu to Lubeke ghenge vnde gheue synt effte vor iewelke twe lubesche mark. vnde dre schillinge. eyne gude enghelsche nobele. alse nu ghenge vnde gheue ys. vor welken summen penninge wy vnde vnse rechten eruen der vorbenømeden vorstinnen vnde vrowen. koninghinnen Margareten vnde eren eruen vnde nakomelingen. dat slot vnde veste. Openraa. vnde de stad Openraa in Sunder Iutlande liggende de koninges berke. Warnes. Sodorp. vnde Alsleff. vnde twe kerspele. Qweerne vnde Stenberk in Angelen. vnde de twehundert lubesche mark iarliker rente de wy in der stad to Flensborch alle iar hebben. vnde alle dat recht vnde rechticheit de wy in der suluen stad to Flensborch hebben. vnde de herede. Sunder Rangstorps herede vnde Riis herede vnde dat halue land to Barsøø. vnde dat gued vnde de leen de nu to deme vorbenomeden slote Openraa liggen vnde hir vore to geleghen hebben. als wy yd hir to gehat hebben myt aller desser vorscreuenen slotes. stades. hereden. berken. kerspelen vnde lenen tobehoringe. akker. wysche. vyscherye. veegank. holtinge. mølen. broke tollen etcetera vorpanden vnde myt desseme ieghenwardeghen openen breue to pande setten. to eynem brukeliken pande. bynnen dessen neghesten vyff iaren to samende volghende nicht to losende. ♦ Wan ouer wy edder vnse eruen dat vorscreuene slot vnde stad. iarlike rente. recht vnde rechticheit. leen. vnde herede. van der vorscreuenen vorstinnen vnde vrowen koninghinnen Margareten edder eren eruen vnde nakømelingen na dessen neghesten iaren vorscreuenen løsen willen. so schole wy en de losinge eyn gantz halff iar to voren kundeghen. vnde losen dat denne vor penninghe. munte vnde summen alse vorscreuen ys. vnde in welkeme iare dat wi edder vnse eruen. dat slot vnde de stad mit der vorscreuenen tobehoringhe na dessen iaren vorscreuen losen. so schal de vorscreuene vorstinne vnde vrowe koninginne Margareta edder ere eruen vnde nakomelinge. des iares vpboren alle de rente de van deme slote van der stad van den berken kerspelen. mølen hereden lenen vnde van deme rechte vnde rechticheit de wi hebben bynnen Flensborch vnde broke vnde tollen vnde allerleye andere stukke wat dar affgaen vnde vallen mach edder kan in ienegherhande mate\ ♦ Vnde also schal de vorscreuene vorstinne vnde vrowe koninghinne Margarete vnde ere eruen vnde nakomelinge ok duen bynnen dessen vorscreuenen iaren neghest tokomende vnde dar na alle iar also lange went dat slot myt syner tobehoringe. van vns edder vnsen eruen van eer edder eren edder nakomelingen loset wert alse vorscreuen steit vnde nicht aff to sl{ae}nde in den houetpenningen. wes se edder ere eruen vnde nakomelinge dar van vpboren also lange dat yd geloset wert alse vorscreuen ys. ♦ Vortmer weret sake. dat desse vorbenomede vorstinne vnde vrowe koninginne Margareta edder ere eruen vnde nak{øe}melinge wolden dat vorscreuene slot Openraa. vppe eyne anderen stede buwen edder eyn ander slot in desses slotes leen nye buwen. so schal men dat nicht høgher losen wen in sulker mate alse vorscreuen steit ♦ Vortmer weret dat dat vorbenomede slot vnde veste Openraa/ vnde berken. kerspele. hereden. recht vnde rente. der vorscreuenen vorstinnen vnde vrowen koninginnen Margareten edder eren eruen vnde nakømelingen aff gesleken affgewunnen. aff vorraden edder myt macht affgedwungen worden de wyle dat yd in eren pande steit. dat got vorbede. so schal de vorbenomede koninginne Margareta vnde ere eruen vnde nakomelinge dar vmme vngeschuldeghet vnde vnghemanet wesen vnde werde wy edder vnse eruen dar to esschet. so schole wi vnde vnse eruen. eer vnde eren eruen vnde nakomelingen dar myt guden truwen vnde myt vlyte to helpen. dat dyt vorscreuen moghe vry wedder in ere were komen vnde blyuen also lange went wy id losen. na iarscharen alse vorscreuen ys ♦ Vortmer schal de vorbenomede vorstinne vnde vrowe koninginne Margareta vnde ere eruen vnde nakømelinge alle ere recht vnde rechticheit in Sunder Iutlande vnuorsumet blyuen vnde ere recht vnde rechticheit hir mede nerghen mede gekrenket edder ouergheuen hefft. allene dat se dyt vorscreuen to pande hefft in aller mate alse vorscreuen steit ♦ Vnde to merer sekercheit vnde vorwaringe alle desser vorscreuenen stukke. so hebbe wy vnse ingheseghele gehenget laten vor dessen breff. ♦ De ghegheuen vnde gheschreuen ys vppe dem Nyenhuse in Darsinge. in den iaren vnses heren. dusend veerhundert. vnde dar na in deme elfften iare. in sunte Fabiani vnde Sebastiani daghe der hilghen martiren\