Wy Erik van godes gnaden der ryke Dennemarken Sweden vnde Norweghen der Wende vnder G{oe}then k{øe}ning vnde herteghe to Pomeren vnde wy Margareta van der suluen gnaden koning Waldemars dochter to Dennemarken bekennen vnde bet{uo}ghen in dessem vnseme openen breue dat de hoghgeborene here vnde v{oe}rste her Erik van godes gnaden herteghe to Sassen vnde de hoghgeborene vorstinne vnde vrowe vrowe Elizabeth van der suluen gnaden greue Claweses dochter de greue to Holsten was vnde herteghinne to Sassen vns van rechter schult weghene sculdich synt dredusend lubesche mark in guden wytten penninghen alse nu to Lubeke ghenge vnde gheue synt effte vor iewelke twe lubesche mark vnde dree schillinge lubesch eyne gude enghelsche nobele alse nu ghenge vnde gheue ys vor welken summen penninghe see vnde ere rechten eruen vns vnde vnsen eruen vnde nakømelingen dat slot vnde veste Openraa vnde de stad Openraa in Sunder I{uo}tlande liggende de koninges berken Warnes Sødorp vnde Alsleff vnde de twe kerspele Qweerne vnde Stenberk in Angelen vnde de twe hundert lubesche mark iarliker rente de se in der stad to Flensborch alle i{ae}r hebben vnde al dat recht vnde rechticheit de sy yn der suluen stad to Flensborch hebben vnde de herede S{uo}nder Rangstorps herede vnde Rysherede vnde dat halue land to Barsøø vnde dat gued vnde de leen de nu to deme vorbenomeden slote Openraa liggen vnde hir v{oe}re to geleghen hebben alse se yd hir to ghehat hebben myt aller desser vorscreuenen slotes stades hereden berken kerspelen vnde lenen tobeh{øe}ringe akker wysche vyscherye veeghank h{oe}lttinge m{oe}len br{oe}ke tollen etcetera vorpanden vnde myt erem breue to pande setten to eynem brukeliken pande bynnen dessen neghesten vyff iaren to samende volghende nycht to l{oe}sende. ♦ Wan ouer de vorbenomede herteghe Erik vnde herteghinne Elizabeth edder ere eruen dat vorscreuene slot vnde stad iarlike rente recht vnde rechticheit leen vnde herede van vns edder vnsen eruen edder nakømelingen na dessen neghesten iaren vorscreuene løsen willen so scholen se vns de l{oe}singe eyn gantz halff i{ae}r to voren k{uo}ndeghen vnde l{oe}sen dat denne vor penninge m{uo}nte vnde summen alse vorscreuen ys ♦ Vnde in welkeme iare dat se edder ere eruen dat slot vnde de stad myt der vorscreuenen tobeh{øe}ringe na dessen iaren vorscreuen l{oe}sen so schole wy edder vnse eruen vnde nak{oe}melinge des iares vpboren alle de rente de van deme slote van der stad van den berken kerspelen molen hereden lenen vnde van deme rechte vnde rechticheit de se hebben bynnen Flensborch vnde br{oe}ke vnde tollen vnde allerleye andere st{uo}kke wat dar aff gaen vnde vallen mach edder kan in ienegherhande mate ♦ Vnde also schole wy vnde vnse eruen vnde nak{øe}melinge ok d{uo}en bynnen dessen vorscreuene iaren neghest tokomende vnde dar na alle i{ae}r also lange went dat slot myt syner tobeh{øe}ringe van den vorscreuenen herteghe Erik vnde herteghinnen Elizabeth edder eren eruen van vns edder vnsen eruen vnde nak{oe}melingen loset wert alse vorscreuen steit vnde nycht aff to slande in den houetpenningen wes wy edder vnse eruen vnde nakomelinge dar van vpb{oe}ren also lange dat yd gel{oe}set wert alse vorscreuen ys. ♦ Vortmer weret sake dat wy edder vnse eruen vnde nak{øe}melinge wolden dat vorscreuen slot Openraa vppe eyne andere stede buwen edder eyn ander slot in desses slotes leen nye buwen so schal men dat nicht h{oe}gher l{oe}sen wen in sulker mate alse vorscreuen steit. ♦ Vortmer weret dat dat vorbenomede slot vnde veste Openraa vnde berken kerspele hereden recht vnde rente vns edder vnsen eruen vnde nak{oe}melingen affgesleken affgewunnen affvorraden edder myt macht affgedwungen w{oe}rden de wyle dat yd in vnsen panden steit dat got vorbede so schole wy vnde vnse eruen vnde nak{oe}melinge vngeschuldeghet vnde vnghemanet wesen. ♦ Vnde werden de vorbenomede hertegh Erik vnde herteghinne Elizabeth edder ere eruen dar to esschet so scholen se vnde ere eruen vns vnde vnsen eruen vnde nakømelingen dar myt guden truwen vnde myt vlyte tohelpen dat dyt vorscreuene m{oe}ghe vry wedder in vnse were komen vnde blyuen also langhe went se yd l{oe}sen na iarscharen alse vorscreuen ys. ♦ Vortmer schole wy vnde vnse eruen vnde nak{oe}melinge alle vnse recht vnde rechticheit in Sunder Iutlande vnuors{uo}met blyuen vnde vnse recht vnde rechticheit hir mede nerghen mede gekrenket edder ouergheuen hebben allene dat wy dyt vorscreuene to pande hebben in aller mate alse vorscreuen steit. ♦ Vnde to merer sekercheit vnde vorwaringe alle desser vorscreuenen st{uo}kke so hebbe wy vnse ingeseghel vnde signet gehenget laten vor dessen breff.