Abbati monasterii Nouicampi Zwerinensis diocesis ♦ Inter curas innumeras quas apostolice seruitutis officium quo uniuersali ecclesie presidemus nobis iugiter ingerit illa precipue insidet menti nostre ut ecclesiastici prelati et ecclesie ipsorum regiminibus commisse necnon ecclesiastice persone in eisdem ecclesiis diuinis obsequiis mancipate cum bonis eorum plena gaudeant libertate ♦ Et ne malignorum conatibus opprimantur libenter prout ad nos pertinere dinoscitur remedium efficax impertimur et rursus obstinatos seu peruersos aliquando iuxta eorum exigentiam delictorum cum debito moderamine castigamus ut saltem pena docente malis abstineant et redire ad uiam rectitudinis compellantur ceterisque ne committant similia aditus precludantur ♦ Dudum siquidem Clemens papa V in concilio Viennensi prouide statuit quod qui quemuis pontificem iniuriose et temere percuteret aut caperet seu banniret uel hoc mandaret fieri uel facta ab aliis rata haberet uel socius in hiis foret faciendis aut consilium hiis daret uel fauorem seu scienter defensaret eundem in illis casibus de predictis in quibus excommunicationem per iam editos canones non subiret esset illius constitutionis auctoritate non obstante quacunque consuetudine anathematis mucrone percussus a quo nequiret nisi per summum pontificem preterquam in articulo mortis absolui a feudis insuper locationibus officiis et beneficiis spiritualibus siue temporalibus que ab ecclesia cui sic offensus preesset episcopus obtineret caderet corporaliter <u>t ¹ ad eandem ecclesiam libere reuerterentur ipsius filii per masculinam descendentes lineam usque ad generationem secundam omni spe dispensationis adempta redderentur ipso facto inhabiles ad beneficia in ciuitate et diocesi quibus idem episcopus presideret obtinenda terra quoque ipsius dum tamen ultra unam diocesim non contineret usque ad dignam satisfactionem eiusdem necnon locus aut loca alia in quibus episcopus captus detineretur quamdiu detentio ipsa in ipsis duraret ecclesiastico subiacerent interdicto si<n> terra eiusdem duas dioceses uel ultra contineret diocesis in qua teneret domicilium principale ipsius et etiam alia in qua foret delictum commissum si qua esset et due alie que sub ipso essent eidem loco magis uicine subiacerent interdicto quousque dignam satisfactionem prestaret <et> in illius loci in quo commissum et facinus necnon ciuitatum et diocesium uicinarum ecclesiis quibuslibet diebus dominicis et festiuis pulsatis campanis candelis accensis excommunicatus publice nuntiaretur et cum absoluendus foret sufficienter et idonee caueret quod inferende pene pareret et auxiliante domino penitentiam perageret iniungendam ciuitas autem que premissa uel eorum aliquod in episcopum suum committeret interdicto donec satisfaceret subiaceret memorato potestas uero consiliarii bailiui scabini aduocati rectores consules et officiales ipsius quocunque nomine censerentur in premissis culpabiles existentes similiter excommunicationis sententie a qua nisi ut premittitur non ualerent absolutionis obtinere beneficium essent subiecti et si quis in aliquo casuum predictorum foret ab excommunicationis sententia in mortis articulo absolutus nisi postquam pristine restitueretur sanitati quam cito commode posset conspectui Romani pontificis se presentare curaret eius mandatum humiliter recepturus prout iustitia suaderet in eandem excommunicationis sententiam reincideret corporaliter ♦ Cum autem ad nostrum non absque magna displicentia peruenerit auditum quod nonnulli iniquitatis filii Marquardus Rennow Iwanus Pogwisk Eggardus Wonfleyt Luderus Petri Sture Sund ² Holk Marquardus Stedeke Witting Henningus et Sauteke armigeri Slesuicensis diocesis associatis sibi quibusdam suis in hac parte complicibus de consilio nobilium uirorum Timmonis Rennow et Wulfardi Pogwisk militum dicte diocesis ac ipsis militibus ratum et gratum habentibus Iohannem episcopum Slesuicensem non sine uiolenta manuum iniectione in eum usque ad sanguinis effusionem dei timore postposito ausu sacrilego ceperint et per unum mensem et ultra captiuum detinuerint nec a captiuitate huiusmodi dimiserint donec promiserit quod ipsis 1200 marchas monete currentis Lubicensis efficaciter soluere uellet ipsumque episcopum multis aliis iniuriis nequiter affecerint necnon etiam ipsum et eius ecclesiam Slesuicensem quibusdam castris seu fortalitiis uillis curiis necnon aliis possessionibus immobilibus et etiam mobilibus bonis et rebus tyrannice spoliarint necnon plerisque colonis et subditis ac reddituariis episcopi et ecclesie predictorum necnon etiam quarundam personarum ecclesiasticarum que in eadem ecclesia diuinis fuerunt et sunt mancipate obsequiis crebra damna et iniurias intulerint et inferant eos multipliciter persequendo et etiam opprimendo quibus quidem malis inualescentibus ac predictis episcopo et personis damna et iniuriam passis necnon per eosdem sacrilegos tam grauiter offensis et quasi omni humano auxilio destitutis nec crudelitati ac malitie ³ ipsorum sacrilegorum resistere ualentibus ipsa ecclesia in eius statu ac bonis et iuribus passim destruitur et diuinis obsequiis etiam destituitur dictusque episcopus et nonulle ex personis eisdem propter iustum metum ipsam ecclesiam et diocesim Slesuicensem deserentes ad Margaretam reginam Dacie ut eius se ⁴ tuerentur et tueantur auxilio duxerint fugiendum nos quorum interest in premissis opportune prouidere uolentes discretioni tue mandamus quatenus uocatis ex officio predictis militibus necnon armigeris ac complicibus et aliis qui fuerint euocandi si de huiusmodi captiuitate sanguinis effusione et detentione tibi constiterit contra ipsos milites et armigeros ac complices in premissis eandem constitutionem auctoritate nostra appellatione remota exequi studeas et tamdiu obseruari facias quousque ipsi sacrilegi et iniuratores iuxta dictam constitutionem in omnibus satisfecerint necnon cum tuarum testimonio litterarum pro tantis patratis per eos excessibus ad sedem uenerint apostolicam absoluendi ipsosque milites armigeros et complices summarie ad dimittendum omnino libere fortalitia uillas possessiones et alia immobilia per eos occupata et etiam ad restituendum mobilia bona et res huiusmodi episcopo personis et ecclesie memoratis et etiam <ut> ⁵ de aliis eisdem episcopo personis ecclesie colonis subditis et reddituariis satisfaciant competenter auctoritate prefata preuia ratione compellas faciens quod decreueris per censuram ecclesiasticam firmiter obseruari ♦ Ceterum si forsan predictorum sacrilegorum ac scelerum patratorum et receptantium eos eaque fieri mandantium ipsisque dantium in illis auxilium consilium uel fauorem presentia pro monitione requisitione huiusmodi seu citatione de ipsis faciendis secure uel commode haberi nequiret tibi monitionem et requisitionem huiusmodi et citationes quaslibet per edicta publica in locis affigenda publicis de quibus sit uerisimilis coniectura quod ad notitiam citatorum et monitorum huiusmodi peruenire ualeant et presertim alicuius collegiate uel parrochialis ecclesia oppidi Sundis dicte Zwerinsis diocesis portis quod ut dicitur est insigne faciendi et etiam si proteruia uel contumacia eorundem sacrilegorum et aliorum quos processus per te super hiis habendi concernent illud exegerit ipsos processus legitimos quotiens expedierit aggrauandi necnon etiam terras et loca ad que dictos sacrilegos et in premissis culpabiles accedere aut stare contigerit strictissimo supponendi ecclesiastico interdicto inuocato ad premissa per te exequenda si opus fuerit auxilio brachii secularis et etiam omnia alia que ad refrenandum dictorum sacrilegorum presumptam tyrannidem et malitiam in hac parte quomodolibet expedire uideris faciendi plenam concedimus tenore presentium facultatem et uolumus quod perinde ipsos citatos requisitos et monitos processus monitiones et citationes predicti arctent ac si eis facti et insinuati presentialiter et personaliter extitissent non obstantibus tam Bonifacii pape VIII in quibus cauetur ne aliquis extra suam ciuitatem et diocesim nisi in certis exceptis casibus et in illis ultra unam dietam a fine sue diocesis ad iudicium euocetur seu quod iudices a sede deputati predicta extra ciuitatem et diocesim in quibus deputati fuerint contra quoscunque procedere siue alii uel aliis uices suas committere aut aliquos ultra unam dietam a fine diocesis eorundem trahere non presumant ac de duabus dietis in concilio generali quam aliis quibuscunque constitutionibus a predecessoribus nostris Romanis pontificibus tam de iudicibus delegatis quam personis ultra certum numerum ad iudicium non trahendis quam alias editis que tue possent in hac parte iurisdictioni aut potestati eiusque libero exercitio quomodolibet obuiare ♦ Datum Bononie 7. kal. aprilis anno 1.