Iohannes etcetera dilecto filio nobili uiro Ludouico de Ballionibus de Perusio familiari nostro salutem etcetera. ♦ Fidei puritas et circumspeccionis industria quibus personam tuam nouimus insignitam ac eciam specialis deuocionis quem ad nos et Romanam geris ecclesiam spem nobis indubiam pollicentur quod ea que tibi duxerimus committenda prudenter et fideliter exequeris. ♦ Tibi itaque quem ad partes Alamanie necnon Boemie Dacie Suecie et Norwegie regna pro nonnullis nostris et apostolice camere negociis principaliter destinamus per te uel alium seu alios nostro et apostolice camere nomine a quibuscumque collectoribus et succollectoribus fructuum et prouentuum dicte camere in predictis regnis debitorum ac eciam depositariis quibuslibet pecuniarum et rerum quarumcumque predicte camere quibuscumque actione uel causa communibus sentenciis dumtaxat exceptis ac eciam commissariis et locatenentibus eorundem et quolibet ipsorum quibuscumque nominibus et cognominibus nuncupentur apostolica uel alia quauis auctoritate hactenus deputatis uel imposterum deputandis petendi exigendi et recipiendi quascumque pecuniarum et rerum quantitates et summas ac huiusmodi res et bona mobilia quecumque nobis ecclesie et camere predictis Romane generalis indulgencie in quibuscumque ecclesiis seu locis concesse illius presertim que annus iubileus uulgariter nuncupatur in dictis partibus debitas et debita. et singulariter in predicto regno Swecie censum siue redditum denarium sancti Petri nominatum necnon de receptis dumtaxat eos a quibus pecuniarum quantitates et res aut bona huiusmodi nomine nostro ecclesie et camere predictarum receperis quittendi absoluendi et perpetue liberandi ac eorum computa dumtaxat uidendi eaque postmodum ad predictam cameram transmittendi plenam et liberam tenore presencium concedimus facultatem. ♦ Uolumus autem quod soluentes huiusmodi super hiis que tibi assignabunt duo confici faciant consimilia publica instrumenta quorum uno penes soluentes pro eorum cautela retento reliquum ad dictam cameram quantocius destinare procurent. ♦ In premissis igitur sic te geras fideliter et prudenter ut nedum proinde a nobis collaudari merearis sed eciam nos ad prestandum tibi apostolicos fauores uberius inuitemur.♦ Datum Rome apud sanctum Petrum x kalendas septembris anno secundo.