Magistro Iohanni de Hesche capellano illustris regis Datie ♦
Is cuius ingressum ad uitam notum natalium maculauit si uite progressum prouidentie studio et morum clarificet honestate non est a misericordia repellendus ob uitium genitorum quod eum defectui non culpe subiecit ♦ Gratia potius dignus redditur et fauore qui per merita scientia probitatis et uite quantum in ipso est maculam diluit quam ingenito culpa in genitorum ingessit ut si arbor ex infecta radice consurgens non tantum appareat ex dilatione ramorum quantum ex utilium fructuum productione proficua non ei ad succissionem securis inititur set cultus diligentia ut uberius fructificet adhibetur . ♦ Eapropter nos prouide attendentes / quod te non ad ima deicceris humane nature labentis sequendo illecebram cuius est ad mala cursus decliuior sed te altum per uirtutum gradus erexeris ad decus scientie melioris conuersationis et uite sicut perhibita tibi fidedignorum testimonia protestantur ac perhibent sperantes quod ad altiora uirtutum conscendas si tibi ad sacros ordines et ecclesiasticas dignitates per dispensationis gratiam ianuam reseremus quod non obstante defectu natalium quem pateris de subdiacono genitus et soluta ad omnes ordines promoueri et ecclesiastica beneficia etiam si curam habet animarum annexam necnon episcopalem dignitatem si te ad eam assumi contigerit obtinere ualeas tecum auctoritate apostolica dispensamus ♦ Nulli ergo etcetera nostre dispensationis infringere etcetera . ♦ Datum apud Urbemueterem . v . idus . iunii anno tertio.