Uniuersis sancte matris ecclesie filiis ad quos presentes littere peruenerint ♦ Nos miseratione diuina Matheus duraciensis Esgerus lundensis Rostagnus neopatensis Raymundus ebredunensis et Bertrandus brendosinis archiepiscopi Franciscus gagetanus Andreas croensis Lampredus traguriensis Egidius adrinopolensis Guillelmus ad partes tartarorum Petrus narniensis Orlandus donicensis ¹ Petrus ciuitatis noue Iacobus lodouensis Zacharias suaciensis Theodericus scutarensis Guilhelmus caturcensis Guilhelmus puteolansis episcopi ♦ Splendor paterni luminis qui sua mundum ineffabili illuminat claritate pia uota fidelium in sua clementi maiestate sperancium tunc precipue benigno fauore prosequitur dum ipsorum deuota humilitas sanctorum suorum meritis et precibus adiuuatur. ♦ Cupientes igitur ut monasterium sanctimonialium de Paradiso sub cura fratrum ordinis predicatorum uiuentium coloniensis diocesis congruis honoribus frequentetur et a christifidelibus studiosius ueneretur. omnibus et singulo uere penitentibus et confessis qui in dedicatione ipsius monasterii in festiuitatibus quoque domini dei nostri Ihesu Christi uidelicet natiuitatis circumcisionis epyphanie palmarum parasceu<e>s resurrectionis ascensionis et penthecostes omnibus diebus domenicis in festis eciam quattuor gloriose uirginis dei matris Marie diebus beati Iohannis baptiste , beatorum Petri et Pauli ac aliorum omnium apostolorum . beatorum Augustini et Dominici confessorum Laurentii et Petri martirorum . beatarum Agnetis Margarete Cecilie Katherine Barbare Lucie ac undecim milium uirginum in commemoratione omnium sanctorum . uel in dictarum festiuitatum / et festorum octauis causa deuotionis et orationis accesserint annuatim . aut qui in eleuatione sacri corporis et sanguis eiusdem domini nostri ipsum in dicto monasterio flexis genibus et complesis manibus adorarint . uel qui ad libros calices casulas albas et ad alia huiusmodi indumenta uel preparamenta sacerdotum et altarium ibidem . aut qui ad fabricam ornamenta luminaria et alia dicti monasterii necessaria manus suas porexerint adiutrices . uel qui cymiterium eiusdem monasterii circuierint uel transiuerint oratorium dominicam et requiem eternam pro sepultis ibidem et omnium defunctorum fidelium salute deuote orantes . nos de omnipotentis dei misericordia beatorum Petri et Pauli apostolorum eius meritis et auctoritate confisi singuli nostrum singulas quadragenas indulgentiarum de iniunctis eis penitentiis misericorditer in domino relaxamus . dummodo loci diocesani uoluntas ad id accesserit et consensus . ♦ In cuius rei testimonium presentes litteras iussimus sigillorum nostrorum appensione muniri . ♦ Datum Auinione anno domini . m^o. ccc^o. xx^o. die martii . xii . pontificatus sanctissimi in Christo patris domini Iohannis pape xxii. anno quarto.