Uniuersis sancte matris ecclesie filiis ad quos presentes littere peruenerint miseracione diuina nos Franciscus perusinus Stephanus lubrensis Uenutus cathacensis Iordanus bobiensis Guillelmus sagnensis Nicolaus damascensis Gregorius feltrensis Bonifacius kironensis Philippus corkagensis Guillelmus castellansis Robertus clonfertensis Thomas girapentensis Henricus lubicensis et Iohannes roskildensis salutem et sinceram in domino caritatem. ♦ Serena uirgo mater plena diuitiis dulcis genetrix saluatoris laudum preconiis meruit uenerari que solem iusticie Ihesum Christum dominum nostrum mundo edidit saluatorem de cuius uberum dulcidine egris medicina languentibus solatium cunctisque eius patrocinium implorantibus misericordie riuulus noscitur emanare . ♦ Cupientes igitur monasterium sancte Marie in Burfenich in quo sanctimoniales diuinis officiis et deodicate iugiter insistunt ordinis cisterciensis coloniensis diocesis congruis honoribus frequentetur et a Christi fidelibus iugiter ueneretur ♦ Omnibus uere penitentibus et confessis qui ad dictum monasterium in ipsius beate Marie festis necnon festiuitatibus natiuitatis domini nostri Ihesu Christi circumcisionis epiphanie palmarum cene domini parasceues resurrectionis rogacionum ascensionis pentecostes trinitatis corporis Christi omniumque singulorum apostolorum et ewangelistorum sanctorum Michaelis archangeli Laurentii Iohannis Baptiste Georgii Martini Nicolai et sanctarum Marie Magdalene Katerine Elizabeth Margarete Barbare Agathe undecim milium uirginum et in commemoracione omnium sanctorum insuper et illorum sanctorum quorum reliquie in dicto monasterio continentur quorum nomina in ipso monasterio in speciali habentur reuerencia et in dedicatione ipsius monasterii aut per octauas predictorum festiuitatum habentium octauas ac etiam singulis diebus dominicis et festiuis aduentus domini quatuor temporum seu quadragesime causa deuotionis peregrinacionis uel oracionis accesserint aut qui missis predicationibus et diuinis officiis exequiis et sepulturis mortuorum in dicto monasterio aut eius cimiterio deuote interfuerint aut qui corpus Christi uel oleum sanctum secuti fuerint cum portantur infirmis aut qui serotina pulsatione campane ter aue Maria deuote dixerint necnon qui ad fabricam luminaria ornamenta et alia dicti monasterii necessaria manus porrexerint adiutrices aut qui pro animabus ibidem sepultorum et omnium fidelium defunctorum oracionem dominicam deuote dixerint . de omnipotentis dei misericordia beatorum Petri et Pauli apostolorum et omnium sanctorum eius meritis confisi singuli nostrum singulas dierum quadragenas de iniunctis penitentiis misericorditer in domino relaxamus dummodo diocesani uoluntas ad id accesserit et consensus ♦ In cuius rei testimonium presentes litteras sigillorum nostrorum iussimus appensione muniri . ♦ Datum Auinione apud sedem apostolicam mense nouembris pontificatus domini Iohannis pape xxii anno nono