Archiepiscopo Bremensi ♦ Non sine admiratione magna peruenit nuper ad nostri appelatus auditum quod nobilis uir Gerhardus comes de Holsatia pridem ad ecclesiam Slesuicensem in cuius sacristia nonnulle quantitates pecunie que de sexennali olim per felicis recordationis Clementem papam beatum predecessorem nostrum imposita in consilio uiennensi in terre sancte subsidium et alias contra rebelles et hostes fidei catholice commitenda et aliis decimis et prouentibus ad ecclesiam romanam spectantibus in regno Dacie collecte fuerunt in nomine romane ecclesie conseruabantur dirigens cum aliis pluribus coadunatis sibi in hac parte complicibus gressus suos timore dei postposito et eiusdem romane ecclesie reuerentia retroiecta lesaque per ipsum libertate ecclesiastica sacristiam uiolenter intrarunt predictam et inde pecunias supradictas sacrilegis extraxit manibus et secum nequiter in sue salutis et fame dispendium asportauit propter que si uera sint preter penas alias contra talia committentes inflictas excommunicationis a canone latam noscitur sententiam incurrisse ♦ Nos autem tam eiusdem romane ecclesie quam dicte terre sancte uolentes indempnitatibus super hiis prouidere fraternitati tue de qua fiduciam gerimus in domino specialem per apostolica scripta committimus et mandamus quot per te uel alium seu alios super predictis et ea tangentibus firmarie et simpliciter et de plano ac sine strepitu et figura iudicii te informans si ea per informationem huiusmodi repereris ueritate fulciri prefatum comitem requirere studeas efficaciter et monere ut infra certum competentem peremptorium terminum quem sibi super hiis duxeris prefigendum ♦ Sacristiam predictam de pecuniis antedictis ac bonis aliis inde per ipsum extractis resarciat ¹ et restituat cum effectu modis et formis quibus erant ibidem antea quousque aliter de illis per sedem apostolicam ordinatum extiterit conseruanda nec ulterius ad talia uel similia presumat extendere manus suas et nichilominus prefate sleswicensi ecclesie super uiolencia et effractione predictis aliisque per eum ibidem commissis excessibus satisfaciat competenter ♦ Alioquin ipsum et quosuis alios premissorum patratores seu qui in eis perpetrandis dederunt auxilium uel fauorem excommunicatos in tuis ciuitate diocesi et prouincia tamdiu facias publice nuntiari certas uillas castra et loca ipsorum subiicendo nichilominus ecclasiastico interdicto et sub eodem interdicto faciendo teneri donec premissa compleuerint et a sede apostolica meruerint absolutionis beneficium ab eadem excommunicationis sententia obtinere aduersus eos et ipsorum singulos ad executionem aggrauationem et exaggerationem predictarum et aliarum penarum de quibus tibi uidebitur processurus ulterius sicut ipsorum exegerit contumacia et tibi uidebitur expedire ♦ Contradictores etcetera ♦ Datum Auinione uii kal. febr. anno tertiodecimo.