Ich Ywan van Reventlo, heren Hartwiges sone van Reventlo, eyn knape, bekenne unde betughe vor alle den, de lesen, hören edder seen, openbare in desser scrift, dat ich mit vryeme willen unde mit rade und vulbort miner husvrowen vor Beken unde minen erven hebbe vorcofft deme erliken knapen unde minem leven swagher Vulf Pogwischen unde sinen rechten erven enes redeliken steden blivenden copes den hof to Bülleke mit alleme rechte, alse he in synen scede belegen is, unde mit aller brukicheit unde vryheyt, alse ik unde mine erven de vorenomeden hoff aller brukelikest unde vryest hebbe beseten und ghehabt betto an dessen dach, unde myt allen stücken unde nütt, de to deme hove ligghet unde leghet stat: dat sint de halve möle tho Bülleke unde veer worde uppe deme Strande, alse se in erer stede oc gheleghen stat, unde dat del, dat ic hebbe in deme Gowense, unde dat holt to dem Berbenmüre, alse it na huvetale to dem hove beleghet is unde thobehöret, unde menliken wat ik in dessem vorenomeden stücken hebbe, alse se to deme <hove> gheleghet sint, vor dat gut tho der Sconenkerken unde teyn marc gholdes to Ghettorpe. To eyner warheit unde stedicheyt so hebbe ik Ywan vorenömet min ingheseghel henghet vor dessen breff. Over dessem cope hafft gewesen her Hinrich van Reventlo, hern Wolwes ¹ sone, de oc sin inghezeghel und alse eyn tüch hefft ghehenghet vor dessen breff, dede is ghegheven na godes bort dusent jar drehundert jar in deme dreundevifftighesten jare in deme dage sunte Barbaren der hilghen juncvrowen.