Van godes gnaden wi Eric de Eldere herteghe to Sassen . to Engheren / to Westfalen des hilghen romeschen rikes ouerste Marscalc bekennet in desseme openen breue dat koningh Waldemar van Denemarken use leue swagher / unde de ratman der stat to Lubeke sin enes rechtes to uns ghe ghan umme schelinghe twischen en in desser wis / de koningh sculdeghet de stat to Lubeke umme iarliken tins des se deme keyser plichtich sin den eme de keyser ghe laten hebbe / unde den em de van Lubeke vor seten hebbet / unde nicht ghe gheuen hebbet alse na godes bort van deme vefteghesten iare / unde van deme en unde vefteghesten iare / dar antwert de van Lubeke to . se hebben den tins ghe gheuen / dar en im de romesche koningh ghe boden heft to geuende / unde oc marcgreue Lodeuich van brandenborch ghe boden heft van des keysers weghene / unde louet unde hopet des / dat se iz al los unde quid wesen scolen / na dem male dat se ene enes uth ghe gheuen hebben / na eres heren bode unde willen . Hir spreke wi aldus to vor recht na rade heren / unde user man / Moghen de van Lubeke des vül komen / dat se den tins uth ghe gheuen hebben . na bode . breuen unde willen / des keysers . unde des marcgreuen / unde mit quitebreuen / der de dat ghelt op gheboret hebbet / so scolen se iz billeken unde van rechte quit unde los wesen / unde heft denne de romesche koningh her en bouen useme swaghere van Denemarken wat ghe louet / dat mach ene use swagher van Denemarken umme manen oft he wil . To ener betughinge desser vor screuenen dingh so hebbe wi dessen bref heten be seghelt mit useme ingheseghele / unde is ghe gheuen unde screuen to Berghendorpe na godes bort driteynhundert iar in deme ver unde veftighesten iare ind der teyn dusent ridder daghe /