In ghodes namen ammen temelic si dat ich Ghese kranc bin vnde bi wetenheyt miner sinne do ich min testament. todeme erstenmal gheue ich miner moder eynen brunen rok vnde eynen brunen hoyken. vnde Taleken miner suster eynen gronen rok vnde eynen gronen hoyken. vnde Wendelen der maghet eynen roden sorkoten vnde eynen ples vnde eynen yresschen rok vnde scho. vnde miner dochter Gheseken eyn par roder cleydere ane sunde ¹ vnde miner dochter Greten eyn par yresscher cleydere. vnde gheue Taleken ² Poyterosen eyne ghele sorkoten vnde Wobeken ³ eynen roden rok. vnde Clawes Poyterosen kinderen eynen gronen yresschen rok. vnde Taleken Richmoden dochter eyne br[unen] sorkoten. vnde gheue den elenden seken to sanct Jurigen iiii marc sundensium denariorum. vnde den willighen armen iiii marc sundensium denariorum. vnde den stouen salmen heyten vnde kopen tve tunnen beres vnde baden arme lude vnde scheyken ⁴ dat ber. vnde gheue viii solidos lubicenses ⁵ vnde eynen witten rok miner modderen. vnde de spanghen ⁶ de toden besten roden cleyderen sitten de solen mine ⁷ dochtere beyde Gheseke vnde Greteke hebben. vnde Clawes Poyterosen vrowe eynen twevoldighen sydenen doc. vnde mine dochtere beyde Gheseke vnde Greteke iuwelich sal hebben eynen sydenen doc. Vort mer wan ich Tideman ghe scheyden bin van minen swagheren so wil ich mines wiues moder gheuen van mineme eghenen ghode xx marc sundissche penninghe dorch vnsen heren ghot. vort mer gheue ich Ghese xii marc sundissch dor ghot. vnde dat vore sprokene ghelt dat ich Ghese dorch ghot hebbe ghegeuen dar sal voremundere to wesen min leue man Tideke vnde min leue bole Klaues. vort mer bidde ich Ghese mine leue swaghere beyde Hinrich Mordop vnde Iohannes van Eesen dat ghi minen leuen man Tydeken nich moghen dorch miner sele willen went he vele dan heft dorch sinen ghoden willen vnde heft mine leue kindere also vor stan dat ich eme danke an miner sele . vor mer der boden sta ich nemende to wen minen leuenmann ⁸ Tideken went he heft dar alle wl vore dan. Dit is ghe scheyn to Valsterbode vor deme voghede van deme Su[n]de Woltere Vsenbrughe. vnde Arnolde Kremere vnde Tideken Scrodere. anno domini m ccc l sexto ⁹ feria sexta post festum Mychahelis.