Wir Iohann von gots gnaden bischoff zu Slysewig vnd Herman Schindeleib gebrudere beide furmunder der dumprobestien zu Mentze zu dieszen ziiten bekennnen vnd tun kunt offenlich mit dieszem brieue/ daz wir vmb vnsers herren des dumprobestes vnd der dumprobestien/ nutze vnd besten willen geluhen han vnd lyhen gemwtlichen in crafft dieszes brieues dem ersamen hern Iohann Hoffwart dumherren zu Mentze ytzunt amptman vnsers herren von Mentze zu Olmen/ oder wer zu ziiten amptmann da were/ alle soliche gute/ die vnser herre der dumprobest/ vnd die dumprobestie zu Niddernolme lygende hant/ vnd Matze Selige biszher da von vnsers herren des dumprobestes vnser vnd der dumprobestien wegen ynnegehabt beseszen/ vnd gebuwet hait mit allen iren rechten/ vnd gewonheiden nichtes darane vszgenommen/ also daz der egenante her Iohann ytzunt amptman/ oder wer zu ziiten amptman zu Olmen were/ der vurgenante gute sich gebruchen/ die nutzen vnd nyszen mag/ vnd die buwen/ in buwe halden/ vnd noch irem besten vermogden beszern schuren schirmen vnd vertedingen sal vnd sollen ane geuerde/ vnd darumbe vnd dauon sal vns der egenante her Iohann oder syne nachkommen/ an dem ampte alle iare in der dumprobestie hoff zu Mentze/ vnd uff den spicher daselbes antwurten/ vnd bezalen/ daz drytteil von den fruchten die uff den guten ierlichen fallende sin ane vnser arbeid vnd kost ane alle geuerde ♦ Des zu vrkunde han wir Iohann bischoff zu Slysewig vurgenant fur vns Herman Schindeleip vnsern bruder/ vnser ingesigel an dieszen brieff gehangen des ich Herman egenant ouch bekennen/ ♦ Datum in octaua epiphanie domini anno domini m^o quadringentesimo secundo.