Honorabilibus et discretis uiris dominis proconsulibus et consulibus ciuitatum Prusie amicis nostris dilectis ♦ Post salutationem ♦ Leuen sundergen vrunde ♦ Wy hebben vornomen dat des hern homeisters boden de he to Calmern gesand hadde alse vmme der schelinge willen van Godlande nenen ende gan konden in der sake mit der vrowen koninginnen vnde etlike van en to dem hern homeistere wedder keret sin vmme een endige antwerde to er to bringende vor sunte Michels dage negest komende van dem hern homeistere/ vnde leuen vrunde wante van desser sake wo se n{uo} nicht geendet wurde vele schaden vnde vnwillen alse wy vruchten vntstan mochten to vorvange aller lande stede vnde des copmans so bidde wy iw vruntliken dat gy by dem hern homeistere vorscreuen so truweliken bearbeiden willen laten dat he syne gude dar to kere vnde synen boden vorbenomet een endige antwerde mit vurder macht an der sake mede geue dat gutliken to betrachtende dat de sake yo to desser tiid eenen guden ende kryge wente wy vmme des willen vnsen boden de wy dar hebben beuolen hebben dat se ¹ id dar solange vorholden sullen bet das des hern homeisters boden wedder to en komen hir vmme bearbeidet dyt duste truweliker vp dat men nich grot vngemak dat dar van vntstan ² mochte vormidet werde des iuwe vruntlike antwerde ♦ Screuen vnder vnsem secrete in sunte Egidii dage des ccccii iare vnses hern