Wir bruder Wernher von Tettingen an des homeisters stat obirster speteler Dutsches ordens vnd kompthur czum Elbinge thun kunth vnd offinbar allen die deszen briff sehen horen ader lezen das wir mith rathe vnd wille vnser mitgebitiger die erbarn geistlichen vnsers ordens bruder vnd vnsere lieben getruwen Frederich von Wallenrode kompthur czur Mewa Iohan von der Dolle voyth czu Roghusen Albrecht Rote burgermeister czu Thorun vnd Conrad Leczko burgermeister czu Danczk gesant haben vnd mit voller macht senden off den tag der in dem Oresunde vorramet ist czuhalden viii tage noch pfingsten nehestkomende mit dem hochgeboren vnserm gnedigen herren konige Erich vnd mit der allirdurchluchsten forstynne frauwen Margarethe konigynne czu Denemarken etcetera als vmb Gotlant vnd die stat Wysbu vnd was die vorgenanten vnsere sendebothen mit den egeschreben herren konige ader frawen konigynne ader iren volmechtigen sendebothen entrichten vnd enden mogen vmb das vorbenumpte land vnd stat vnd in allen andern sachen is sey noch rechte noch mynne ader fruntschaft ader in welcherley andern weyse sie das eyntrechticlich vnd ane gefeer gethun mogen des geben wir in von vnser vnd vnsers ordens wegen volle macht vnd geloben mit craft deses briefis stete vnd veste czuhalden bey guten truwen vnd ane argelist alles das von in geendet wirt vnd entrichtet vnd haben czu merer sicherheit vnser ingesegel das wir gemeynlich czu allen vnsers ordens sachen off desze czeyth gebruchen an deszen brieff laszen hengen der gegeben ist off vnserm huse Elbingen an sente Iorgen tage noch Christi geburt im xiiii^c vnd vii^den iore.