Tekst efter A
Henri par la grace de dieu roy Dengleterre et de France et seignur Dirlande\ as tresorer et chamberleins de nostre eschequier saluz .. ♦ Nous volons de lassent de nostre counsail et vous mandons que de les sommes desouz escrites/ desqueles noz bien amez les maire baillifs et bones gens de la ville de Lenne. firent a nous cheuance en nostre grande necessitee a la reuerence de diuerses[1] noz lettres du priue seal a eux adressees/ facez auoir as susditz. maire baillifs et bones gens paiement ou suffissant assignement cestassauoir de cynk centz marcs a nous liuerees a Derby le quatorszime iour daugst darrein passez par les mains de Henri Longioun [2] . de vynt liures liuerees a lonurable piere en dieu leuesque de Bangor/ et de cynquante liures liuerees a mestre Richard Dereham sur lour gages alantz nadgairs en nostre message vers les parties de Denmarke. Norweye et Swece/ receyuantz deuers vous des susditz maire baillifs et bones gens. sibien les dites noz lettres du priue seal a eux enuoiees/ come les endentures parentre eux. et les susditz euesque et Richard faites en celle partie tesmoignantes les liuerees a eux faites de les vynt liures. et cynquante liures susdites\ ♦ Donne souz nostre priue seal a Westminster le viii. iour de decembre lan de nostre regne quart/
.